Diga! Dels efièches inesperats de la modernitat… Quand faguèron la linha LGV entre Nimes e lo Clapàs, nafradura badanta entre vinhas e estanhs, te bastiguèron una mena de tèrme que s’enerbèt e s’embartassiguèt lèu fach. Ne sortís que totes los lapins sens domicili fixe dau ròdol i plantèron bordon e s’i reprodusiguèron e multipliquèron coma de … lapins. D’ont mai que lo nombre sempre mai bèl d’ermasses, l’interdiccion de la caça sus lo territòri de la Metropòli de Montpelhièr ne fan una conilhièira paradisiaca que sos estatjants van quèrre son manjar per las vinhas e las culturas a l’entorn.

Problèma grandaràs per los païsans, solide, que i daissan pel e borra mas tanben per los pesolhs revenguts que, pauròts, sabon pas pus coma jogar sus un terren de gòlf dels cinquanta mila traucs…

Ensagèron ben a la debuta d’i deslargar quauques rainards. Pense-te, aquò i faguèt coma un vessicatòri sus una camba de fusta. Mèstre Rainard prenguèt lèu fach, plan fach, lo camin de las garrigas nautas per plumar los darrièrs perdigalons. Enfin pas totes. Sonque aqueles que se faguèron pas espotir sus l’autorota -los conilhs pas tan cons passan dejós, eles-, o que siaguèron pas tuats per los caçaires -qu’an pas totes inventat la podra que peta e que, a la ramassa un còp de mai, los considèran totjorn coma nosibles e li tiran dessús.

La segonda solucion enfaciada per lo cònsol d’una de las comunas envasidas siaguèt de comunicar sus nombre de panèus publicitaris la recèpta dau civièr de lapin. Aquí d’unes elegits animalistas s’escanèron que la trapèron saique un pauc pebrada. Agèsse demandat la recèpta de la mameta, ne seriam pas aquí…

Puòi i anèron amb la fura per los agantar e los menar dins de païses que n’an pas vist la coeta d’un dempuòi que lor flanquèron la mixomatòsi… Mas la deportacion faguèt fracatge.

Vòls que te diga? E ara, es lo prefècte d’Erau, e… rau!! que va als camps non pas en cèrca d’inspiracion per son discors venent, tanpauc a la caça als papilhons mas als lapins. Coma espaurugal se fa melhor e benlèu tanben coma braconièr que faguèt sas armas sus los bancs de l’institut politic de Bordèu e de l’ENA. Aquí França! Te cau aver facha l’ENA per anar caçar de conilhs que, a çò que me sembla a ieu que siái pas nascut de la darrièira lapinada, pòdon dormir sus sas doas aurelhas…

Enfin, es çò que ne dise …

La guinhada de l’IEO34. E, rau!