Aprèp l’intelligéncia artificiala, vaquí vengut lo temps de l’Intelligéncia Augmentada.

Ieu, coma vos, cada jorn, cada setmana, jògi amb las cartas: Carta del supermercat. Carta blava. Carta Vitala. Carta d’identitat. Carta del dentista. Carta de l’oculista. Carta del cinemà. Carta grisa... Quora m’arrèsti de jogar, me pausi e me disi: se i ajustas los identifiants e los mots de passa; e un bricon de Amarzòn, de Tica Tòca, de Basap, e de Ontanam... pertot ont passas, siás ficat... Very ficat! Alara, per èsser invisible... Per èsser invisible, pòdes totjorn te levar matin...

E son en trin d’anar mai luènh encara. E per aquò que de longa vos secunhan per s’entresenhar sus vòstre mestièr, vòstras envejas, vòstres gosts, vòstres sòmis... Es çò que se ditz l’Intelligéncia Augmentada... Qu’es aquò l’Intelligéncia Augmentada?

Per balhar una idèa, prenètz un jove al licèu, per l’orientacion, sovent sap pas tròp de que causir... Se se farà jornalista o dentista? Garagista o urgentista? Alpinista o tractorista? De que causir? Es engarçat! Trantalha! L’Intelligéncia Augmentada anarà furgar dins son ADN e li aconselharà: violonista. E causirà: violonista. Content d’aver causir el meteis, solet!

E Jaume, timidòt coma es, a enveja de bartassar mas sap pas amb qual anar bartassar? Julieta o Joseta? Marcèl o  Pèire? Albana o Alban? Bruna, blonda? Brun, blond? Sap pas! L’Intelligéncia Augmentada anarà furetejar dins la vida bartassièra de son paire, dins la vida bartassièra de sa maire e l’aconselharà: Ange! E causirà: Ange. Plan content d’aver causit el meteis, solet!

E pel sopar, benlèu trantalhatz entre salçissòt o cambajon? Cassolet o tripon? Rocafòrt o pelardon? Copetada o crèma cramada? Cafè o buta-cafè ? Que causir? L’Intelligéncia Augmentada analisarà tot çò qu’avètz pas manjat dempuèi que sètz nascut e vos aconselharà un cheeseburger. E soparètz tot contenton. Tot contenton d’aver causit solet vòstre sopar portat per vòstras envejas.

Deman, l’Intelligéncia Augmentada mestrejarà non solament nòstres identifiants, nòstres mots de passa, gerirà nòstras comandas sus Amarzòn, sus Tica-Tòca... mas causirà per nos, sens que nos en avisèssem, nòstre biais de viure, d’aimar, de manjar... Es ela qu’aurà nòstras cartas en man.... E la mercejarem...

L’òme coma la femna se dirà pas pus: “Connais-toi, toi-même!”; es l’Intelligéncia Augmentada que li dirà: “Moi, je te connais mieux que toi-même!”