France 2 es la cadena oficiala de l’Estat francés. Es son canau d’informacion e lo son jornau de ueit oras deu ser es un pauc sa votz, la votz deu poder. Soi curiós de conéisher lo grau de libertat deus jornalistas e lo de la redaccion.

Per jutjar de son "vejaire neutre", cau observar lo JT cada ser e espiar lo biaish dambe lo quau cada subjècte es tractat. Se pòt véser aisidament quins eveniments son presentats positivament e quin ac son negativament. Darrèrament, èi podut observar lo tractament de dus eveniments que’s pòden comparar (sonque per part, solide) e sustot que’s debanavan en medish temps.

Un vist positivament peu govèrn: las manifestacions pro-europèas de Georgia e un, solide vist negativament, las susmautas canacas de Navèra Caledonia.

L’ahar es simple. Per presentar las encausas, sus Georgia, disen que lo pòble es en contra d’un projècte de lei dens los comentaris, e per Navèra Caledonia, disen que los independentistas son opausats a un projècte de lei.

Mes sustot, son las entrevistas suu trepader que van hèr la diferéncia. A Tbilissi, vam solide entrevistar los manifestants que van exprimir lor malícia contra aqueste projècte de lei que va limitar lor dret. Aquestas manifestacions semblan aver pas causat nat trabuc a degun en vila.

A Nomea, per contra, van utilizar un aute caire de vista e meslèu balhar la paraula a los que patissen deus problèmas causats per la susmauta e van focalizar sus aquestes desagradaments. Sus mès de duas setmanas, èi pas vist qu’un sol còp una frasa d’una manifestanta que disèva qu’angoren pas deishar anar la luta.

Solide que la susmauta a causats problèmas de totis aus estatjants, mes quitament quan un movement es tranquille e que lo JT vòu muishar una cara negativa, va entrevistar comerçants que son greujats per un desprofieit pr’amor de la baisha de las practicas.

Èi sovent dit (e escrit) que los "micro-trepaders" deveren estar interdits. Es talament aisit de balhar l’impression que volètz en publicar pas que çò que va dens vòste sentit.

Los exemples d’un tractament subjectiu de l’informacion sus France 2 son numeroses, caleré tanben analizar lo vocabulari emplegat, mes aqueste èra, per sa concomitància, vertadièrament interessant d’estudiar.