Es partit un còp de mès, los jornaus televizats an, dambe la campanha electorala, de qué botar dens lor temps d’emission. Mes la question que’s caleré pausar, es: son pro neutres e justes per complir lor mission d’informacion? Cresi que non pas.

Normalament, quan una eleccion arriba, caleré tornar botar los comptaders a zèro e considerar cada candidat coma egau aus autes. E ben, non, pas brica, la cadena estatala France 2 muisha una parcialitat de non pas créser quan presenta las eleccions.

Aquò se debana en duas parts. La purmèra consistís en prénguer un subjècte e de presentar çò que perpausa cada partit. Uei, per exemple, an parlat de l’eretatge. An presentat las perpausicions deu RN, deu grop presidenciau e deu Front Popular Navèth. Conéisher la pausicion deu RN sus aqueste subjècte es drin suberrealista, es tan interessant que de saber çò que pensavan Franco, Mussolini o Salazar (disi pas Hitler per polemicar pas) suu dret de succession.

E doncas lo quite partit deus Republicans se pòden tostemps tutar, hèn pas part deus causits. Imaginatz çò que pòt pensar quauqu’un qu’es pas especialament politizat. Lo messatge qu’es balhat es clar: atz la causida entre aquestes tres partits, los autes comptan pas o son pas serioses.

La dusau part consistís en causir una circonscripcion e la presentar. Entrevista deus candidats deus tres partits elegits per France 2, un pichon micro-trepader que vau pas res suu tèma “Los avisses son partatjats”, e haut, lo torn (de pipaut) es hèit.

Arriba après lo moment mès risolièr (au dusau grad), quan lo presentator deu jornau, un còp lo reportatge acabat, presenta la lista deus “autes” candidats, que pareish un cinc o seish secondas, pr’amor que la lei les obliga. Demòra mens d’una seconda per legir cada nom. A costat de la vista en persona deus candidats qu’an la paraula, l’efèit es pas brica comparable. E visca la democracia!

Tot aquò ahortís l’impression que las autas listas e candidats valen pas res e que votar per eths a pas nada valor.

Doncas sabètz que se volètz balhar la vòsta votz (quina expression!) a un candidat pas protegit per France 2, ètz un gran resistant intellectuau. Òsca!