Opinion
La pujada del Nòu Front Popular obre una escasença pels occitanistas
Lo programa del Nòu Front Popular non es ni federalista, ni contra la discriminacion de las lengas de França autra que lo francés. Se cercatz las proposicions en favor de las regions, trobarètz sonque:
Favorizar l’ensenhament de las lengas regionalas en oltra-mar.
Metre en plaça un plan ralh e fret, crear de servicis exprèsses regionals, adoptar un moratòri sus la barradura de las linhas pichonas e las tornar obrir tre que possible, tornar sus la privatizacion de Fret SNCF.
e mai subre lo conflicte colonial en Kanaquia
abandonar lo procediment de reforma constitucionala qu’a per mira lo desgèl immediat del còs electoral”.
Se cercatz dins las aliganças politicas per las eleccions legislativas, en Bretanha, l’Union Democratica Bretona sosten lo Nòu Front Popular, mas obtenguèt pas cap de circonscripcion en escambi, tal coma lo Partit Occitan en Occitània o las autras compausantas dels partits autonomistas d’esquèrra de Region et Peuple Solidaires (RPS) , mentre que RPS se presenta dempuèi 1989 amb Los Ecologistas, qu’apertenon al Nòu Front popular. E mai, lo primièr deputat de la federacion Regions e pòbles solidaris (RPS) elegit en 2012, Paul Molac deu far campanha contra una candidata del partit Comunista pel Novèl Front popular.
Sonque en País Basc nòrd, Euskal Herria Bai (EH Bai) “País Basc Òc” coalicion de partits abertzales d’esquèrra radicala e de centre-esquèrra intègra lo Nòu Front Popular. Non es una conversion de l’esquèrra al federalisme mas EH Bai es ara una fòrça d’esquèrra màger al País Basc Nòrd, integrada al sistèma politic local.
En Corsega tanben, independentistas e autonomistas d’esquèrra se presentan en defòra d’aquela aligança.
Ça que la, malgrat lo pauc de temps disponible, i aurà de candidats dels partits autonomistas mailèu centristas dins las 15 circonscripcions d’Alsàcia amb Unser Land, dins 13 circonscripcions de Bretanha amb Strollad Breizh (Partit Breton), dins las 4 circonscripcions de Catalonha Nòrd amb Unitat Catalana e “Sí al País Català”, e mai dins 3 circonscripcions del País Basc Nòrd amb lo Partit Nacionalista Basc (EAJ-PNB).
En Occitània, los nacionalistas d’esquèrra del Partit Occitan presentan de candidats dins 9 circonscripcions amb lo sosten de la federacion “Regions e Pòbles Solidaris” en concurréncia amb una candidatura d’esquèrra del Nòu Front Popular. Los nacionalistas centristas de Bastir Occitània de la federacion “ Regions unidas d’Euròpa” auran de candidats dins 7 circonscripcions.
En Corsega, los nacionalistas qu’an ja 3 deputats sortents se presentan dins las 4 circonscripcions per Femu a Corsica e pel Partit de la Nacion Corsega (PNC) sens aligança amb cap de partit parisenc.
Aital, sèm dins una situacion politica ont per lor pes politic, pòdon ser elegits d’elegidas e elegits autonomistas al futur parlament francés: de basques amb lo sosten del Nòu Front Popular, de còrses en defòra de tota coalicion, lo deputat centrista Pau Molac gràcia a son enrasigament local personal, de candidats autonomistas d’oltra mar en capacitat d’èsser elegits sens cap de coalicion.
E mai se lo movement federalista francés sembla flac, mostra aital son enrasigament creissent dins la vida politica francesa, amb la capacitat d’aver de representants al parlament francés.
Aquela preséncia coincidirà amb la pujada del Rassemblament Nacional Francés. Amb un Front Popular Fòrt, es possible que non i aja de majoritat al parlament. Seriá una crisi màger per la V Republica. Fàcia al nacionalisme estreit del Rassemblament Nacional Francés, se podriá trobar un consens per transformar lo sistèma presidencial e centralizat de França. Pòt èsser una oportunitat per l’occitanisme.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Une partida de la populacion a votat contre Lo Pen; una autra a votat contre l'esquerra. Dins lo monde rurau los que volan tondre lòrs pelosas an votat l'esquerra, los que volian conservar un jardin an votat lo Pen.
Tot aquò per dire qu' i a pas un vòte per quauqu'a ren mas un vòte contre quauqu'a ren.
Lo second torn aportara ren de nuòu. Macron probablament demissionara per prener un grade au niveu europeen; tornaren votar per la presidenciela. D'aqui los frances se pausaran belcòp de questions. L'incertituda vai renhar en mestre avant de trobar una solucion d'autant mai que la crisa economica tòca França.
Esitam pas a surtir daus chamins tots traçats e elevam nòstre niveu politic. Sem citoiens frances e las leis votadas per França nos concernan. Mas, tant ben sem occitans e avem lo dreit de reclamar nos dreits d'occitan.
a Paris votarai occitan servira pas a granda causa mas votarai jamai RN ou Fronté crapular , soi un occitanista liure é indépendantista. D'esquera o de dreicha? sabi pas !!! é m'en foti plan !
Los fachs son testuts, coma disia l'autre ! Per aqueles que dobtarian encara de l'actituda tras que previsibla d'aquel Novèl Front "Populari" (sustot elitista-bobo-parisenc) rapòrt a l'occitan, vaqui aquesta constatacion cap sorprenenta relatada dins l'editorial de Jornalet del 23 de junh 2024 :
"Nos sèm tanplan assabentats que qualque candidatura occitanista a contactat lo Nòu Front Popular, mas qu’aqueste non sonque a refusat de collaborar mas tanben a quichat per lo retirament de listas. Aquel episòdi lamentable nos remembra que çò mai semblable a un jacobin de drecha es un jacobin d’esquèrra, totes dos units dins lor refús instintiu e impulsiu de la diversitat lingüistica de l’estat francés."
E en despièch d'aquò vos obstinatz encara e encara a voler creire que "La pujada del Nòu Front Popular obre una escasença pels occitanistas" ?
Ua precision: non solament EHbai a integrat lo navèth front popular mes que i ei afiliat lo candidat unic de la coalicion d'esquèrra, Peio Dufau, sus la 6au circonscripcion deus Pirenèus Atlantic (parçan de Sent Joan de Lus/Hendaia). De mei lo suplent de la socialista Coleta capdevièla, sus la circonscripcion sharnèga de Baiona, lo prumèr cónsol de Sent Pèir d'Irúber, qu'ei tanben un abertzale d'EHbai. E per çò qui ei de la quatau, la basco-biarnesa, lo deputat biarnés sortent, Iñaki Echaniz, en per'mor deus sons combats entau basco e l'occitan com tau problèma deu lotjament e tanben tau procèssus de patz en Bascoat n'a pas nat candidat abertzale o occitanista qui's presente contra eth.
Seriosament, a qui anatz far creire que per Glucksmann o Mélanchon parlar occitan seria "polit e revolucionari " ?
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari