Lo cada jorn de las actualitats va del personal al mondial. Aicí doncas un punt d’informacions desparièras d’aqueste mes de julh de 2024:

• Chocolat: Tadej Pogacar pren pas posicion dins lo debat fondamental e bufèc entre chocolatina e pan al chocolat. Declara: “Dins una fornariá de Narbona, crompèri lo melhor brownie qu’ai jamai manjat de ma vida.”

• Designacion: Per proposar un primièr ministre, lo Novèl Front Popular auriá melhor fait de ba jogar a la belòta, a la petanca o a la corta-palha. Aurián bravament ganhat de temps!

• Estrena: Aqueste divendres 26 de julh, alara que tota França e la planeta seràn a gaitar navegar los batèus olimpics sus Seina, lo pòble occitan serà recampat a Sebasac per balhar un vam novèl a l’Estivada.

• Festejaires: Qual pòt èsser susprès d’una fotografia de Ciril Hannouna e Jordan Bardella a festejar amassa a Sant-Tropès? Qual-a sap se los dos montèron a l’encòp sus l’esquina de l’ase de la Brigida Bardòt?

• Flamba: Concèrt del Massilia sul Pòrt-Vièlh per festejar los 40 ans del grop. S’agís pas d’alucar una flamba olimpica simbolica mas d’alimentar tot aquel temps e aquò contunharà la flamba occitana…

• Gat: Un gat siamés de 16 ans es portat desaparegut carrièra Trivala a Carcassona.

• Man: A la fin de la partida amb Salfòrd, perqué Dragò, la mascòta dels Dragons catalans, me sarrèt la man?

• Plomb: Lo president Trompeta s’es fait tirar l’aurelha. Pensatz qu’aquò li aurà mes de plomb pel cap?

• Punh: Fa pena de veire lo president Trompeta levar lo punh, simbòl de las lutas obrièras e popularas.

• Taulejaires: Dins lo temps, lo Chirac mangèt amb lo paire Le Pen. Ara, la Marina e lo Jordan sopan amb los conselhièrs de Macron, l’Edoard Philippe o lo ministre de las armadas… Adversaris al defòra mas complicis per menar una politica de mai en mai a dreita?

• Toponimia: Ataca novèla chinesa contra l’identitat dels Oigors. Son a cambiar tota la toponimia del país amb sas referéncias geograficas, istoricas e religiosas als luòcs, vilatges e vilas. Qual sap se aperabans mandèron una mission d’estudis en Occitania o en Bretanha?

• Tranquilles: Se lo Mbappé jòga al Real amb tant de vam que la sason passada al PSG o pendant la Copa d’Euròpa amb los Blaus, lo Barça pòt envisajar de remportar aisidament la Liga venenta!

Reactualizat Roch