Opinion
Pangramas en occitan: siam creatius!
De còps per de traduccions de logicials ma creativitat es requerida d’un biais inesperat. Adaptar una galejada, traduire una manièra de dire informala. De còps cal èsser ingeniós (e ajudat) quand cal provesir la lista dels 10 000 mots mai emplegats de l’occitan. Mas aquí vos vòli parlar d’una traduccion que requerís de picar un pangrama dins nòstra lenga. Valent a dire: una frasa que cobrís l’integralitat de l’alfabet. Per nos ajudar los desvolopaires dònan un ligams cap a un site que lista de pangramas. Mas l’occitan es absent e los pangramas del catalans foncionan pas.
Vaquí mon ensag en utilizant los caractèrs especials:
“Lo jove lingüista ambigú e misteriós s’exclamèt: aquò es lo un camèl kaki d’Anaïs que fugís en zigzagant per la plaça de la fornariá, beurà tot lo Whiskey!”
Manca: é
Per memòria l’alfabet occitan: a á à b c ç d e é è f g h i í ï j k l m n o ó ò p q r s t u ú ü v w x y z
Se pòt levar kaki estant que Whiskey es d’una brava ajuda pels W K e Y.
Un autre pangrama trobat dins mas memòrias de traduccion, coneissi pas l’autor:
“Lo dròlle bilingüe que manja un yaourt de ròcs exagonals e kiwis verds farà un an mai”
Pensi que lo pangrama ideal contendriá las sequéncias LH NH e benlèu TZ pro tipicas de l’occitan.
Se volètz emplenar los comentaris amb vòstras proposicions, poiriá èsser interessants!
Quitament la Wikipèdia en occitan a pas cap de pagina pels pangramas, seriá l’ocasion :)
Desvolopèri un esplech per verificar se una frasa es un pangrama en occitan: https://www.mejans.fr/pagina/pangramas.html
Lo logicial que me demanda un pangrama en occitan es una aisina per aprendre a picar al clavièr mai rapidament e aver sas estatisticas de picada. E lo trabalh preparatòri èra de fornir de listas de mots en occitan, 200, 1000, 2000, 5000, 10 000 mots. Mercegi lo Congrès per son ajuda! Vos parlarai lèu d’aquestes logicials per ajudar a picar. D’aquel temps podètz anar sul site seguent e causir l’occitan dempuèi una setmana: https://monkeytype.com/ pel mièg de la pagina clicatz “english” per causir nòstra lenga. Piqui 48 mots per minuta ieu amb una correccion de 94% :P
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
D’ençà que i aviá pas pus cafè, l’experiéncia del país de Reünion se visquèt coma en Peró e a Salardú, mas Loïsa voliá de kiwi
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari