Quand pensi que, en causa de vos, pòdi pas agachar lo “passariu” —dison ben lo passacarrièra!— de Lutècia amb totas aquelas naus que carrejan los esportius brandussant cadun los drapèus de lor país. Vos passi los comentaris televisuals; serà un florilègi de banalitats per las escòlas de jornalisme mas, après tot, los jornalistas o animators devon justificar lor salari, me pensi.

Coma cada delegacion a sonque un pòrtabandièra, totes los autres brandussan cadun un pichon drapèl de papièr o de plastica; supausi que las consignas son estadas passadas at home que devián far creire a lors conciutadans qu’èran estrambordats de se trobar dins la vila lutz, etc.

N’ai vist un al mens qu’èra mai interessat per çò que podiá veire sus son telefonet que teniá dins una man mentre que, amb l’autra, brandussava son drapèu personal! Risca de se far brandir las pelhas en tornant al país…

Es tot çò que pòdi dire del passariu qu’ai agachat pas qu’un detzenat de minutas avant de començar mon prepaus. O me poiràn contar los legeires qu’auràn tot seguit sul  fenestron si que non corri  la risca de morir pus bedigàs encara que çò que soi ara… Enfin…

Cossí volètz rendre compte d’un eveniment o de mai d’un quand sètz en permanéncia lo cuol entre doas cadièras…

Nòstres vesins d’Otra-atlantic, los qu’an panat lo nom d’un continent per se’n servir per lor usatge personal —coma o faguèt una dama Delga per Occitània!— nos susprendràn totjorn.

L’èx numèro 45, capmessorguièr, falocrata, un arpalhand en mai d’aquò, foguèt lo primièr a temptar un còp  d’estat amb una armada d’òmes de lei pus corromputs un que l’autre e a pas encara abandonat son projècte. En responsa a un jornalista, diguèt que se reservava lo drech de reconéisser pas lo resultat de las eleccions a venir levat en cas d’eleccion! Ajustèt que se, per cas, èra desfach, seriá la pròva d’eleccions farlabicadas coma en 2020!

Lo president en exercici, sens o voler benlèu, ven de tornar una pèira a la saca de l’èx-45 en anonciant que renonciava a candidatar per una mandatura novèla e que passava lo flambèu a la vice-presidenta, Kamala Harris. Passi sus las circonstàncias de son abandon que las coneissètz mas èra una decision que totes los democratas esperavan e quitament los donators que finançavan sa campanha.

Qual foguèt susprés e pres de cort? L’èx-45 que, desempuèi annadas, se trufa de Sleepy Joe, ditz e escriu qu’es un paucval fraudaire portat a la presidéncia, etc.

La vice-presidenta a recebut immediatament lo sosten de la quasitotalitat dels delegats qu’avián causit de sosténer lo president çò que fa pensar que la concurréncia serà inexistenta al moment de l’investitura oficiala mas los politicians estatsunidencs nos resèrvan de suspresas a còps…

Kamala Harris, ela, a trobat, leu fach, l’estrambòrd necessari per contunhar la campanha entamenada per Joe Biden e començat de  trucar sus son rival mai que lo president en exercici.

Wait and see!

Los que seguisson los afars estatsunidencs e los Estatsunidencs que “sabon legir” son conscients que lo país encara mai poderós del planeta es a la crosada dels camins: o la republica, imperfèita de segur, contunha o un regime, al minimmum “illiberal” se met en plaça amb una mafia politica a la manòbra.

Venèm de veire pendent aquesta mandatura lo comportament dels líders republicans e de lor boss qu’an transformat lo partit per ne far un gang digne de l’epòca bèla de la proïbicion ! e l’elefant, lo simbòl dels republicans, avança coma aquela bèstia fèra qu’espotís tot sus son passatge quand es destrobada.

Los democratas son pas d’innocentons tanpauc mas fins ara, que sàpii, an respectat çò qu’apelam “lo pacte republican”

Los quatres meses a venir seràn encara mai violents que çò que serián estats am lo president en exercici.

Qualques rasons se ne volètz: Kamala Harris es una femna afro-asio-americana, tres “qualitats” pels republicans; en mai d’aquò, a fach una carrièra  dins lo  domeni de la justícia… Podètz imaginar los arguments que l’èx-45 va desvolopar. Los arguments volaràn bas pels plaser de sos amics.

Perqué s’interessar als Estatsunidencs quand avèm nòstres pessaments aicí? Per un temps encara, nos cal pas oblidar que, quand los Estats units esternudan, Euròpa a la gripa!