Un desenat de chifras, un brave vintenat de letras e quauques signes diacritics e de ponctuacion: ne vaquí pro per nos exprimir per escrit.

• 90: Dins Tarn, la vitessa es limitada a 90 sus plan de rotas departamentalas. Aquò a la granda jòia dels fabricants de panèus “90” qu’as l’impression de ne trapar 2 per quilomètre!

• Colonialisme: Al bèl mitan de l’expedicion dels afars corrents, lo president Macron escriu al rei de Rabat per reconèisser una sobeiranetat de Marròc sul Saarà occidental. Colonialista un jorn, colonialista totjorn!

• Confusion: Los avesques, la dreita e l’extrèma-dreita confondon la Cèna e la taulejada de Dionisòs. An tròp quichat sul vin de messa?

• Corbasses: A veire lo nombre de corbasses, negres coma la nuèit e coma la suèja , del costat de Rodés per pradas o pargues, sèm en dreit de nos demandar se lo Joan Bodon auriá pas plan melhor fait de contar Lo Rei dels Corbasses puslèu que los contes del Drac!

• D’esquèrra?: Lo novèl Primièr ministre anglés fòrabandís del Partit trabalhista unes militants que demandavan l’aumentacion de las allocacions familhalas!

• Diversitat: La ceremonia de dobertura dels Jòcs Olimpics èra sensada celebrar la riquesa e la diversitat de la cultura francesa. Atal, manquèrem pas de veire andrò breton, rondèu de Gasconha, sardana de Catalonha, cigonhas d’Alsàcia, grop vocal basc, estatua de Pasquale Paoli, …

• Eleccions: Per traficar eleccions presidencialas, un biais consistís d’anonciar chifras de mai de 97% d’adesion al candidat quasi-unic. L’autre biais, mai democratic, coma a Veneçuela es d’anonciar un triomfe 51-49!

• Impacte: En tota modestia, cal saupre mesurar l’impacte d’aquesta modèsta cronica setmanièra. Los istorians de la bona retendràn qu’es apuèi la lectura del Papieròt del 18 de julh que lo Joe Biden decidèt de se retirar de la competicion presidenciala americana!

• Lengas: L.’anglés es plan present dins la comunicacion e las anóncias dins los estadis del Jòcs olimpics. Pels Jòcs paralimpics, es encara mai simple qu’una sola lenga es oficiala: l’anglés. En mai dels andicaps fisics, lo gost amar del monolinguisme!

• Miliards: Dins una jornada, lo Bernat Arnaud a perdut 11 miliards de dollars. Lo pauròt vei sa fortuna passar en dejòs de 200 miliards de dollars! Pensi pas que valga la pena de dobrir una soscripcion o de faire la quista …

• Potingas: Quand te cal prene mai d’una potinga cada jorn, descobrisses medicaments en plaquetas de 6, 10, 12, 15, 20… dins de boitas que te pòdon faire las unas quinze jorns, las autras tres setmanas, un mes o un trimèstre. Val mai que siaguen simpatics cò de l’apoticari per faire los reassortiments …

• Revolucionari: D’un costat, lo cant del Ça ira amb los aristocratas de penjar a las lantèrnas. De l’autre, lo refús d’aver ministres LFI que vòlon just panar quatre sòuses als mai rics…

Deschifrat Roch