Precision, s’agís pas exactament de cartografiar mas de repertoriar d’elements, de provesir mai de detalhs e de corregir se cal. Benlèu coneissètz ja OpenStreet Map, un servici de cartas adobat d’informacions practicas. Es la comunautat d’utilizaires que manten e fornís tota mena d’informacion per dire de prepausar de mapas de qualitat. Tot lo monde pòt participar e melhorar la basa de donadas liura. Se contribuir via lo site Web de costuma pòt èsser un pauc complicat per un debutant, l’aplicacion StreetComplete fa venir l’experiéncia plan ludica. De fach, la ludificacion es centrala dins l’aplicacion per entreténer l’activitat de l’utilizaire e l’encoratjar a téner de participar. L’aplicacion compta los ponches e desverrolha de badges segon lo tipe de contribucion. Quand l’utilizaire lança l’aplicacion, es localizat e de quistas a l’entorn s’afichan. Qualques exemples:

donar las oras de dobertura d’un lòc public, lo tipe de sol (asfalte, grava, etc), nombre de plaças per las bicicletas, preséncia de naut parlaire pels malvesents, identificant de bòrna incendi, nom d’una via, çò que se recicla, sens dels escalièrs, etc.

Quand l’aplicacion demanda un nom, avètz per defaut la balisa “fr” mas podètz apondre la traduccion en occitan;)

Telecargatz StreetComplete, anatz defòra e completatz las donadas per Occitània!