• Cançon: L’aiga de Seina, te farà morir, pecaire! L’aiga de Seina te farà perir…

• Ciclisme: La corsa ciclista sus rota se faguèt sens aurelhetas. Seriá estat mai logic de la disputar en febrièr, temps annadièr de las aurelhetas. Amb benlèu una derogacion pels representants de Belgica que lor i agrada mai las nèulas.

• Concepcion: La finala del rugbí de 7 proposèt doas concepcions de las seleccions. D’un costat, Fidji amb sos jogaires grands e aisits de lors mans, formatats per la practica. En fàcia, los Blaus amb mai de transfèrts del l’apròchi XV cap al 7.

• Entomologia: Sabiái pas que los parpalhòls sabián nadar…

• Espionatge: Medalha d’aur de l’espionatge per l’entrainaire de l’equipa femenina de fòbal de Canadà que mandèt un dròne fintar l’entrainament de las neo-zelandesas!

• Imnes: Quand de còps lo public se botèt a cantar la Marselhesa? E de mostrar un còp de mai lo costat desplaçat de sas paraulas. Comparar las esportivas e los esportius dels autres païses a soldats ferotges que venon desgargantar femnas, maires, nòvias, companhas, amigas e sòrres es un pauc quichar, non, per de simples jòcs.

• Integracion: Encara urós que lo Recampament Nacional siague pas al poder. Imaginatz una seleccion tricolòra formada solament de francesas e de franceses “de soca”: adieu la qualificacion, las medalhas e la victòria dins plan d’espòrts…

• Ippon: Soi espantat de veire los espectators franceses cridar de jòia quand un rescontre de judò (ja, vesi pas cossí faire de chuc amb d’aiga?) s’acaba per un “ippon” per çò que demorava jamai un uòu sul tatami!

• Ivèrn: Pensan d’organizar los Jòcs d’ivèrn de 2030 dins d’estacions d’Aups ont tomba pas mai un borrilh de nèu!

• Falsa libertat: La dança-trencada, l’esquèit-bòrd (Ò, Mamet, crompa-me un esquèit-bòrd!) o lo BMX artistic son presentats coma d’espòrts joves, portaires de libertats novèlas d’expression! Un còp aquò dit, se compren pas brica unas competicions amb jutges capables de notacions al centième de punt…

• Mans: Jòcs de mans, jòcs de vilans. I a pas que lo gardian al fòbal qu’a lo dreit d’utilizar las mans. La fin de partida entre França e Argentina mòstra que totes los jogaires pòdon utilizar las mans per metre quauques carpans e cachamorres!

• Mascòta: Unes catalans pensèron que los Jòcs olimpics de 2024 se debanavan a Girona, Argelers de la Marenda o Sureda. A véser la mascòta, avián confondut la boneta frigiana amb una barretina!

• Mercat: Vos aconselhi pas d’anar faire las crompas amb un panièr de desquet. Es coma emplenar d’aiga un ferrat amb una escrumadoira: lo panièr es traucat!

•  

Pèire de la Cobertòla-Roch

(seguirà…)