• La panna: Res foncionava suls rasals internet a Vincennes. Installacion sabotada, fialses copats… Qual podiá èsser lo colpable? Las brigadas antiterroristas se metèron a l’òbra e, fin finala, descobriguèron l’autora de la malparada: una faïna!

• Parentat: Qual sap quicòm de segur suls ligams de parentat entre Simon de Montfòrt e Nelson Montfòrt?

• Pim-pom: Cossí volètz que lo Félix Lebrun ganhe al pim-pom contra los chineses se eles tustan dins la pauma pichona amb una raqueta e lo pauròt amb un pòrta-pluma!

• Protèstas: De notar la protèsta del mistral contra la tenguda de las espròvas de vela del costat de Marselha: refusèt de bufar! Del meteis biais, las èrsas de Polinesia demorèron magrinèlas pels surfaires.

• Publicitats: Unas marcas de beguda e de mangiscla, qu’an res de véser amb una alimentacion sana, an pas mancat de se faire veire…

• Racisme: Es de mal comprene la cançon racista dels argentins rapòrt a la preséncia de jogaires eissits de l’immigracion dins las formacions francesas. Quant d’argentins an per origina las emigracions europèas?

• Recapte: Compreni pas tròp aquel biais de recaptar lo martèl en l’escampant lo mai luènh possible en plaça de lo rengar coma cal a sa plaça dins la boita dels espleches. Qun marrit exemple!

• Recepcion: Quand lo president Macron recebèt per un sopar los grands d’aqueste monde, seriá estat mai logic de los convidar a la cantina del vilatge olimpic per los botar d’a fons dins l’ambient de la quinzenada! Pastas, iaorts, fruchas e aigas mineralas al menut…

• Restriccions: De VII a la plaça de XV; un volley de plaja a 2 en plaça de 6 en sala; de basquet proposat tanben en format 3 x3; lèu, de basquet un contra un?

• Terminologia: Un vèrb plan utilizat pels jornalistas e los esportius es “quifar” (s’arregalar). Demòra de l’integrar dins la lenga occitana, çò que demandam al Congrès permanent, a l’Academia occitana, a l’IEO, a la FELCO, a las Calandretas e als correctors del Jornalet! Coma trobadors, volèm poder dire: ”Te quifi, fifrolet-a!” (quif-quif, asinòt?).

• Tòcas: Dins los duèls a l’espada d’un còp èra, las causas èran claras. La confrontacion s’acabava a la primièra sang. Mas ara, es pas la pena que qualqu’un o qualqu’una ensage de m’explicar las tòcas validas o pas entre escrimeires e escrimeiras!

• Universalisme?: Solas son admesas suls sites olimpics e pel public las bandièras de las nacions representadas oficialament. Consequéncia: fòrabandidas las bandièras occitana, basca, bretona, catalana, còrsa,…

• Velodròme: La pista per las espròvas de ciclisme èra faita dins un bòsc de Siberia. Per miracle, cap de correire o de participanta foguèt atacat per un ors. (Bon, èra just per dire de pas confondre bòsc, fusta e lenha!)

Pèire de la Cobertòla-Roch