Lo monde de l’Esperanto s’amassa dens çò que s’apèra “congresses” mes que son en hèit sustot encontres culturaus, ludics, quitament s’i a, a còps, un quicomet d’oficiau quan d’associacions internacionalas ne profiten per s’amassar. Los Esperantistas poloneses an hèit lor congrès ongan en la vila de Kalisz, los Italians que’u haràn a Montecatini Terme e los Catalans que’u hascón a Vic.

Las amassadas mès beròias son la de la joentut, aperada IJoKo (prononciar IYÒKÒ por Internacia Junulara Kongreso) e UK (OKÒ por Universala Kongreso). Lo purmèr se debanèc en 1905 en Boulogne-sur-Mer.

En 2024, peu purmèr còp, lo congrès universau estoc organizat deu 3 au 10 d’agost a Arusha, una vila de Tanzania au pè deu Kilimanjaro. Estoc una grana escaduda per mantunas rasons.

Solide, pr’amor qu’un brave nombre d’Africans i podoc prénguer part. Una delegacion de 147 vengoc deu país medish, 73 deu Burundi, 67 de la Republica Democratica deu Congo, en mès deu monde venguts de Benin, Senegal, Rwanda e Kenia. Quicòm de pas jamès vist per abans, se consideram las dificultats qu’an los Africans per finançar un viatge o simplament recéber un visa.

Las condicions estón adobadas per justament facilitar la venguda e lo sejorn deus continentaus, per exemple los que vengón d’un país industrializat paguèn un pauc mès per que las cotizas deus Africans sian mens caras. Tot parièr, la mangiscla èra a gratis per eths, mercès au medish sistèma.

Concèrtes, pèças de teatre, danças, conferéncias e un quite encontre de butabala contra una equipa d’Arusha se succediscón dens un ambient hestiu. Un bessonatge dambe la grana comunitat Massai estoc apitat après l’encontre dambe lor representat per Africa sancèra.

L’Esperanto creish fòrça lèu en Africa e aquò balha un gran espèr a l’encòp per la lenga mes tanben peu continent que contunha de’s daubrir e de collaborar internacionalament.

L’arsec, l’engatjament e la joentot deus Esperantistas africans balhèc fòrça vam au movement e aus participants venguts deu monde sancèr.

Tre bela sukceso de la Universala Kongreso en Aruŝo!