• 70: Se dins lo departament de Tarn se convida a rotlar sovent a 90 sus las departamentalas,-èx-nacionalas, entre Vilanuèva d’Òlt e Tolosa es mai sovent lo panèu 70 que se rescontra. Es probable la meteissa entrepresa que fa tanplan los panèus 70 coma los 90. “Setanta que tante!”

• Afars corrents: Lo ròtle d’un govèrn dels afars corrents es mai que mai de faire en sòrta que los afars demòren a l’arrèst. L’invencion de la corsa immobila…

• Aigas: Se ditz que plan d’aigas mineralas son pas tant mineralas qu’aquò. Conclusion logica: bevètz de vin!

• Astronautas: Dos astronautas americans son a virar a l’entorn de la planeta Tèrra. Partits per uèit jorns, an ganhat un sejorn de uèit meses, vist que lo module pel retorn se pòt pas ligar coma cal a lor naviri espacial. Aquò es una realizacion bèla de la societat Boeing que d’aquesta passa ne manca pas una! Demòra totjorn la solucion de l’escala de còrda per tornar dins las pradas de las vacas! Questions: An previst de que manjar o es lo regime per magrir? An una idèia de lor votason pel president-a dels Estats-Units?

• Bilinguisme: França a totjorn de mal amb la diversitat linguistica. La ceremonia de barradura dels Jòcs olimpics se faguèt en bilinguisme tancat: francés-anglés.

• Bodega: L’Escòla de Bodega de Vilardonèl (Aude-Montanha negra) festejarà sos 20 ans (l’òm a pas cada jorn vint ans!) lo dissabte 14 de setembre venent: mòstra, concors, taulejada, espectacle, passa-carrièra, balèti amb, per convidats, Bodegam-Bal, Fresquèl e Frezinat sens parlar d’unes convidat-suspresas. Vilardonèl, plaça-fòrta del reviscòl de la bodega…

• Calor: Cap al 15 d’agost, las aigas de Mediterranèa afichavan una temperatura de l’òrdre de 30. Lèu, se pescarà lo peis ja bolhit…

• Cançon: Aprèp los refuses de Maurici Chevalier, Carles Trenet e Ninò Ferrer de venir cantar a Carcassona, l’Enricò Maciàs a proposat de venir animar la Feria (sens taures) de Carcassona.

• Canicula: La canicula vos balha la canha.

• Engana: A 7 ans, la pichona Alteà voliá faire de quarate. Quand arribèt al gimnasi, la mandèron al taequandò. Tota timidòta, gausèt pas dire l’engana. E ara, es campiona olimpica de taequando (e lo quarate es pas mai espòrt olimpic!)

• Estivada: La davalada serà determinanta pel retorn afortit de l’Estivada. Als occitanistas de venir bons mercand-a-s de las quatre sasons per esvitar l’ivernacion de la manifestacion!

• Fenolh: Aquò’s lo nom eissit del latin per designar aquela planta que desvela una bona flaira de pastagàs. Del temps d’Olimpia, en Grècia antica, la planta se disiá: maraton. Demòra d’estudiar se la consomacion de fenolh (e de pastagàs?) ameliòra resisténcia e performança per córrer lo maraton!

Parloti-parlotet Roch