• Filha de De Gaulle?: Le grand Carles èra anat cridar a Montreal: «Vive le Québec libre!». Per celebrar la Liberacion de las contradas occitanas en 44, Caròla Delga difusís un comunicat amb marcat en gròs:«Occitanie libre!». I a pas agut de seguida juridica: cap d’acusacion de separatisme! ”Qual escriguèt sus nòstras parets: Occitania liura!» (Joan Larzac, L’estrangièr del dedins).

• Garrolhas: Se passatz per Ozbequistan, esvitatz las garrolhas amb las populacions localas. Los Ozbècs son tornats de París amb uèit medalhas: cinc de bòxa, una de judò, una de luta e una de taequando!

• Medalhas: Sabi pas perqué dins las espròvas olimpicas d’ipisme (e tanben long de la sason) an pas previst medalhas de balhar als cavals e a las egas. Visca la corsa camarguenca que ten dos classaments: un dels rasetaires e l’autre dels buòus!

• Monina: Compreni pas plan aquel afar de recèrca de vaccin contra la monina. Tot lo monde sap plan al vilatge que quand as pres una brava monina, res non val una bona alhada per tornar partir d’un bon pè! Solament, los laboratòris farmaceutics per multiplicar lors beneficis refusan d’informar sul benfait de las recèptas de las mametas!

• Nhaca: L’esquipa de França olimpica de fòbal, compausada de bric e de bròc, amb jogaires liberats atal-atal per sos clubs, mostrèt un imatge mai collectiu, mai solidari, mai ofensiu e mai jogaire que las pretendudas estelas que proposèron un jòc trist, atupit, sens vam e sens imaginacion per l’Eurò.

• Passa-muralha: Saludam lo passatge del president Puigdemont a Barcelona e sa disparicion instantanèa cap a Belgica, desjogant los plans policièrs e l’operacion Gabia! Apuèi, lo fait de residar a Waterloo, sabi pas s’es un bon signe per una victòria a venir, coma d’aver Catalonha dirigida per un socialista espanholista. Un eròi de seria americana auriá capitat de dintrar dins lo Parlament en sautant d’un elicoptèr o en passant per un tunèl cavat jos las muralhas (unas idèias pel còp que ven?).

• Plat nacional: Sus la rota entre Vilanuèva d’Òlt e Tolosa, es fòl lo nombre de pizzerias que se trapan, sens parlar d’unes distributors automatics. Cal arribar a las pòrtas de Tolosa per véser (enfins!) un restaurant proposar de caçolet a emportar!

• Religions: Del temps dels Jòcs Olimpics, sus França-2 e França-3, las emissions costumièras passèron a la trapanèla (parli pas de las emissions occitanas que las disparicions estivencas son la nòrma). Unas solas resistèron: las emissions religiosas. Aquò vòl dire que las religions son fòra o al-dessús de la societat?

• Sobrietat: Se los democratas ganhan la presidenciala d’America, los ciutadans poiràn comptar sus un budgècte sens excès amb una presidenta qu’a per pichon nom Camèla (o quicòm atal…)!

• Watson: Japon seguís pas las demandas mondialas de metre fin a la caça de las balenas. Aquò empacha pas Danemarc d’arrestar l’ecologista que se bat per defendre lo mamifèr mari! Val mai faire plaser a Toquiò que defendre las bèstias! Un novèl episòdi del vièlh òme e la mar…

• Zebritud: Al Japon, planhissián las vacas negras que se fasián manjar pels tavans e autres mosquilhs. Alara, an zebrat aquelas vacas amb bendas blancas que desvarian los insèctes que van veire endacòm mai se la planeta es redonda. S’es pas notat de fenomèns de discriminacion de la part de las autras vacas rapòrt a las collègas zebradas!

Parlic-Parlòc Roch