• Pichon nom: La presidéncia nòrd-coreana interditz a las joves filhas d’aver lo meteis pichon nom e de se cofar coma la filha del president. Los parents son convidats a cambiar lo pichon nom de lor dròlla!

• Messorga: Lo sénher Trompeta difusís un imatge falsièr de la cantaira Taylor Swift qu’apelariá a votar per el! Es una messorga de primièra vist que la cantaira s’afirma coma una democrata. Per Trompeta, s’agís pas d’espandir messorgas mas de trapar biaisses de faire parlar d’el! I capita al punt d’aver un entrefilet dins lo Jornalet!

• Paure òme: La fortuna personala d’En Potina es estimada a 242 milions de dollars (Sabi pas sa sap comptar en robles…)

• Linx: Es pas una vida d’èsser linx d’aquesta passa. Animal protegit en França, empacha pas d’unes de lo voler eliminar. En contra, d’autres tenon presonièr e engabiat dins lor ostal un especimen, aquesit clandestinament, per ne faire un animal de companhia!

• Retard de corrièr (1): Una carta de Nadal es arribada a destinacion al País de Gallas 121 ans apuèi! Pels servicis postals britanics, lo corrièr èra pas perdut, mas qualqu’un se seriá amusat a remetre la carta dins lo circuit.

• Retard de corrièr (2): Los retards dins la distribucion dels corrièrs per la Pòsta francesa son d’una inconsequéncia grèva. Vòli reçaupre mon ”Tiron encadenat” lo dimècres e pas lo dijòus, e encara mens lo divendres!

• S’aviam sauput…: En Blanquer, ex-sinistre de l’Educacion, sus las ondas de France-Inter: ”Soi estat mal comprés, que de fait soi un desfenseire de las lengas regionalas…”. Paure òme, èra pas tant evident qu’aquò!

• En discutida: A l’EOE, los occitans de las Valadas contèron l’accion bèla que menèron per la lenga del temps dels Jòcs Olimpics d’ivèrn de Turin. Se pausèt la question per saupre se caliá temptar lo meteis tipe d’accion pels Jòcs prevists dins Aups a l’ivèrn de 2030. Una part dels participants estipulèron que la question primièra èra d’empachar la tenguda dels Jòcs per rasons ecologicas e economicas e que la campanha “contra” se podiá ela tanplan se menar en òc. Del temps de Larzac, cridèrem Gardarem lo Larzac en plaça de demandar lo bilinguisme dins lo camp militar!

• Paciéncia: Posar l’aiga del potz amb una poseta.

• Lo questionament del fau: En França, lo paure hêtre est totjorn a se pausar la question metafisica: ”Être ou ne pas être?”. En Occitania, lo fau, mai virat cap a l’accion (o a l’inaccion) se demanda de longa prosaïcament: ”Fau o fau pas?”

• Autras questions metafisicas per nuèits de luna plena:

  • Quna longor per las encambadas per córrer darrèr las correjòlas?

  • A qun atge la luna vièlha pòt prene sa retirada?

  • Ont va dormir lo solelh la nuèit?

  • Pòt lo crostet grandalhat èsser magre de mica?

  • Qual es lo rapòrt de l’amarum amb la mar?

  • Avètz ja ausit un chòt banut cantar: ”Cocut! Cocut!”?

  • De qué dire quand i a pas res pus a dire?

• Mea culpa: De fait, l’occitan èra present dins la ceremonia de dobertura dels Jòcs Olimpics. Caliá aver l’aurelha fina: dètz segondas de son de borrèia auvernhata. Sèm un confetti de pas res e un son fugitiu dins la cultura de França!

Bèl-bèl Roch