Me prepausi de vos listar las diferentas opcions qu’avètz per poder escriure en occitan simplament. Valent a dire, aprofiechar de la correccion ortografica, daissi de caire las possibilitats qu’avètz ligadas a l’agençament del clavièr. Se vos interèssa, escriguèri un article fa un an: Clavièrs, prediccion e verificacion ortografica en occitan

Tractament de tèxte

Qu’utilizetz Windows, Linux o un Mac, podètz installar la seguida burotica liura LibreOffice. Conten un logicial de tractament de tèxte, un logicial pels fuèlhs de calcul, un logicial de creacion de presentacions e encara mai. L’interfàcia d’aquesta seguida logiciala es traducha en occitan. Amai embarca per defaut un corrector ortografica per l’occitan lengadocian.

Telecargatz l’installador aquí: https://fr.libreoffice.org/download/telecharger-libreoffice/

Realizèri un tutorial de trapar aquí: Guida d’installacion de LibreOffice en occitan

Navegacion web

Sens me pèrdre en justificacion, vos conselhi d’utilizar Mozilla Firefox. Se vos cal una rason: charra occitan. Es tanben l’unic navegador web que prepausa d’extensions amb la tòca de corregir la picada en lenga nòstra. E sèm pas paures d’aqueste costat! Doas extensions pel lengadocian, una pel gascon, una per l’aranés! Los autres dialèctes, qu’esperatz?:)

Lo recuperaretz amb aqueste ligam: https://www.mozilla.org/fr/firefox/all/desktop-release/win64-msi/oc/

Un còp lo navegador liure installat, podètz anar al menú “Moduls complementaris” per cercar “occitan” e aital installar l’extension que desiratz emplegar. O ben, navegar sus aquesta pagina web: https://addons.mozilla.org/ca/firefox/search/?q=occitan.

Quand vos trobaretz dins un camp tèxt auretz la correccion ortografica. Notatz que benlèu vos calrà fa “clic drech => lenga” per causir l’occitan.