Diga! A la Boissièra, lo vilatjòt d’a costat, i a un pastre, un pastre de cabras dins aqueste país penjalut. E pauròt, a plogut sus la mercandisa, es vengut vièlh coma un camin e pense ieu que deu faire cent ans de dimenges, o pas luònh… D’unes dirián qu’es pro vièlh per faire un mòrt.

Lo problèma amb l’atge es l’obsoleséncia programada, ven rarament sens los plèntis-e-mèntis que l’acompanhan que lo papetum a totjorn pet o foira… Coma disiá l’autre “lo vielitge es un fracatge”.

Per tornar au paire Matieu —li disèm amistosament Matièu Salèm— tant talament n’a son confle qu’a decidit de se tirar de davant tre que la lei li permetrà d’o far en França, qu’es pas de bon per el de deslocalizar sa mòrt fòra país. Lo problèma es que se vòl suicidar amb de fricandèu! Ja qu’es pas aisit d’anar en Soïssa o en Belgica per morir, imaginatz un pauc quand volètz far lo darrièr badalh a còp de fricandèus e que lo mond d’amontdaut sabon pas solament çò qu’es…

Òu, lo tipe vos a pas esperat, fa un moment qu’i trabalha e que penchena amb las dents. Faguèt la fortuna dels melhors carnsaladièrs de La Cauna, te bastiguèt sus lo davant una panolha que fa plaser a veire mas que l’empacha de córrer darrièr aquelas putas de cabras. Mas ara a comprés qu’es la debuta de la fin.

Vòls que te diga? Me demande ieu coma aquò se va passar quand serà votada la lei de fin de vida. Qual li va donar la darrièira bocada s’es pas pus capable de forquetejar d’esperel que lo fricandèu, vòle dire lo bon de fricandèu, aquò va tapar la perfusion o la darrièira seringada? E coma li administrar, freg o cuòch en lescas padenejadas qu’en mai los servicis de fin de vida e de suènhs paliatius son pas pro equipats per aquò far. Quina responsabilitat per la familha o lo còrs medical! E tanben, es que n’i aurà dos de fricandèus? Un que dona la mòrt e un placebo? E, sa mutuala de misèria de paure païsan prendrà en carga lo camionatge dels fricandèus dempuòi La Salvetat – es aquí que i a lo melhor- fins au moritòri dau Clapàs? Crente que i aja un despassament non remborsat per la Secu. En mai que me daissère dire que lo fricandèu, vòle dire lo bon de fricandèu, pren son temps per agir. Benlèu que caudrà faire mai d’un viatge amb la camioneta dau boquièr?

Fin finala, lo problèma de la fin de vida es pas simple quand òm vòl finir coma òm a viscut.

Enfin, es çò que ne dise ieu …

La guinhada de l’IEO34. E, rau!