Èra plan amagat lo quasernet de Noè que trapèrem jos un pèira de la montanha d’Alaric (la vertadièra montanha sacrada que lo mont Ararat li a panada la glòria). Èrem sortits prene l’aire aprèp una tasta comparativa entre la cartagèna del domèni Carbonneau e la granacha de Cascastèl, lo muscat de Sant-Joan de Menerbés, lo ratafià de Roèrgue e lo flòc de Gasconha (Vos contarai la resulta -perduda e improbabla- de la tasta un autre còp). Doncas, quand aviá fait montar a la demanda divenca los animals sus son arca, lo Noè aviá escrit quauquas indicas sus cadun e caduna. Avèm capitat de las descriptar d’un biais clar e precís (???!) que vos revelam en exclusivitat mondiala dins aquesta cronica setmanièra del Jornalet.

(Per de rasons de lisibilitat e de clartat fosca, avèm classat las bèstias dins l’òrdre alfabetic dels pichons noms)

Vidas animalas

• Adelina la monina arrèsta pas de grimacejar.

• Adòlf lo muòl es lo mai grand dels caparruts.

• Agesilàs lo corbàs a lo còr las.

• Albèrt lo coleoptèr viatja en elicoptèr.

• Alban lo pelican finta son calepin.

• Albina la lapina bolega lo nas e la coeta.

• Alina la faïna furga, furga, furga…

• Anatòli lo cagaròl a pas de parapluèja.

• Annibal lo caval es totjorn aval.

• (10)- Aronda l’ironda mena la ronda.

• Audeta la lauseta fa grassa matinada.

• Auziàs lo corbàs cèrca la rota per Damàs.

• Beluga la formiga a mila vint e tres amigas.

• Berenguièr lo formiguièr atisa lo foguièr.

• Bernarda la pincarda manja una sieta de cardas.

• Bernardin lo rat-grondin nada a contra-corrent.

• Bernat lo gat fa tot a l’amagat.

• Bertomiu lo cotoliu fa piu-piu.

• Bertrana la rana semena bonas granas.

• (20)- Bubu lo zebu a tot begut.

• Camilha la canilha jòga a las sèt familhas.

• Carlòta la granhòta es plan minhòta.

• Carolina la galina picoti-picotà lèva la coeta e puèi se’n va!

• Cassandra la mandra manjariá plan formatge.

• Catarina la catarineta, bèstia a Bon Dieu!

• Cesar lo casoar se marquèt a Politecnica.

• Claudina la calandreta monta contra lo rai de solelh.

• Colombina la colomba recèrca la patz.

• Coscorilh lo conilh es conectat.

• (30)- Cristina la catarineta repara la mobileta.

• Cristòl lo parpalhòl es un brave arganhòl.

• Cro-Manhon lo crocodil se vòl metre quicòm jos las dents.

• Elena la balena filtra la sal de la mar.

• Elmut lo cocut nisa dins un pibol traucat.

• Enric lo benarric voldriá pan e vin.

• Eric l’eiriç, vestit coma un ase de picas.

• Gabrièla l’abelha conta los afars de la velha.

• Gaspard lo leupard totjorn partís e jamai non torna…

• Gaston lo reiaton fiuleja, fiuleja…

• (40)- Gontran l’elefant va al cors de trompa de nòtas se trompant.

• Gracús lo grapaud gratusseja.

• Grimaud lo babau sauteja.

• Josefa la girafa per beure emplena la garrafa.

• Leon lo cameleon s’es crompat una camerà.

• Marcèl l’aucèl compta sas plumas.

• Margòt l’agaça quand plòu va a la caça…

• Martin lo lapin es un bèl aurelhut.

• Napoleon lo lion, un rei sens corona…

• Nestòr lo castòr es lo mai fòrt.

• (50)- Norbèrt lo pollambèrt partís per Anvèrs (o pels travèrses?).

• Olivièr l’esparvièr jòga dins la cort de recreacion.

• Pascal lo moissal: tres grans de sal.

• Pedauca l’auca patin-patan patin-patan!

• Radase l’ase repren tot a la basa.

• Raquèl la rata-penada prepara la tapenada.

• Renat lo rèn a plan mal de rens.

• Sarà la missara sarra los uèlhs per plan dormir.

• Serafin lo passerat fila coma un rat.

• Tiston lo cangoró a pas qu’un saut a faire.

• (60)- Zefirin lo zèbre espèra novembre (o decembre?).

… … …

(Descriptadura en cors…)

Dactarin Roch