A Tolosa, per las eleccions municipalas de 2020, l’ecologista Antoine Maurice, cap de la lista ciutadana “Archipèl Ciutadan” amb lo sosten de LFI aviá perdut de solament 4 000 voses al segond torn fàcia al cònsol màger Jean-Luc Moudenc dels republicans (LR). Recentament, Jean-Luc Moudenc quitèt los republicans e candidatèt per un quatren mandat a Tolosa per anticipar una autra candidatura a dreita. De lor costat, los ecologistas, LFI e lo PS tolosan temptan de bastir un lista comuna per l’esquèrra, mas se garolhan per lo cap de lista.

A Marselha, la lista ciutadana d’esquèrra de la Prima Marselhesa gavidada per l’ecologista Michèle Rubirola gasanhèt l’eleccion municipala de 2020, malgrat la lista concurrenta de LFI. Sièis meses aprèp, amb la demission de la cap de lista ecologista, es l’ancian socialista Benoît Payan que devenguèt cònsol màger de Marselha. Las atacas duras de la dreita contra la municipalitat d’esquèrra de la Prima marselhesa an ja lançat la campanha de las municipalas de 2026. L’oposicion mostra son union e assumís son estrategia de secutament de la Prima marselhesa per temptar de reconquistar la primièra vila d’Occitània. A l’esquèrra, las discussions portan subre l’integracion de LFI dins la Prima marselhesa, per un novèl front popular en vista de las municipalas de 2026, mas lo posicionament pro centrista e tradicionalista de Benoît Payan sembla un empach grand.

A Bordèu, l’ecologista Pierre Hurmic, dins una aligança d’esquèrra sens LFI, prenguèt la comuna en 2020 après setanta cinc ans de regne de la dreita e se deuriá representar en 2026. La sociologia de la vila es d’ara enlà favorabla a l’esquèrra, e mai se non se sap lo posicionament de LFI. De son costat, una temptativa d’union de la dreita e del centre es a se bastir per contrar la mutacion ecologica de la ciutat e aprofitar de las oposicions que suscita.

Lo cònsol màger socialista de Clarmont d’Auvèrnhe Olivier Bianchi es oficialament candidat a las municipalas de 2026 per un tresen mandat. Amb lo renonciament de son opausant de dreita tradicional, Jean-Pierre Brenas (Los Republicans), la dreita clarmontesa se cerca un cap de fila novèl per las eleccions de 2026.

Ja se preparan las eleccions municipalas al nivèl de la part politizada de la populacion dins las vilas grandas d’Occitània, aital coma dins las vilas mejanas generalament dirigida per lo partit socialista o los republicans, mas amb un Rassemblament Nacional (RN) qu’i faguèt generalament de bons resultats.

Dins las comunas mai petitas, es lo temps de la cerca de personas novèlas per remplaçar los elegits demissionaris o tròp vièlhs.

En general, la feblesa dels partits occitans non lor permet pas de participar a aquela preparacion de las municipalas de 2026. E es encara tròp d’ora per las associacions occitanas per organizar de debats subre la plaça de l’occitan dins lor comuna per las municipalas avenidoira. Pasmens, fòrça accions se fan e se pòdon faire legalament al benefici de l’occitan al nivèl de las comunas.

Pasmens, es lo temps ont se bastisson las aliganças e las listas. Es lo moment bon per far ausir localament la votz occitana coma simple ciutadan o ciutadana l’interior dels partits o dels movements ciutadans implicats dins las futuras municipalas. Es lo moment bon per s’inscriure dins la dinamica de formacion de las listas per las municipalas de 2026.

Nòta:

• LFI: La França Insomesa
• LR: Los Republicans
• PS: Partit Socialista
• RN: Rassemblament Nacional