Òc, tot va plan, Dòna Marquesa, ça que la:

• Ministra de l’Educacion: La novèla ministra de l’educacion fasiá part dels signataris del recors alprèp del Conselh constitucional contra la lei Molac. Aquò promet…

• Ministra de l’Ecologia: La familha de la ministra de l’Ecologia fa part dels dirigents de la segonda entrepresa francesa de petròli: Perenco. Una entrepresa a las amiras fòrtament ecologicas: recupèra los poses en fin de produccion per ne tirar fins a la darrièra gota al mesprètz del respècte de l’environa e dels dreits dels pòbles autoctònes

• Servicis publics: En tota logica, lo renfortiment demandat dels servicis publics per èsser al mai prèp de las gens serà melhorat amb un demesiment de 100 000 pòstes del nombre de foncionaris.

• A l’escota: Sus la question de las migracions, lo ministre Retalhonat es lèu anat véser cossí las causas se passavan en Italia.

• Assabentat: Lo novèl ministre encargat de la luta contra las discriminacions èra opausat al maridatge per totes e vòl pas l’egalitat dels dreits per las personas LGBT. Al mens, es al fial del dorsièr…

• Estalvis: Lo novèl Primièr ministre aviá res de mai pressat que de signar l’engatjament de pagar los 520 milions d’euròs del deficit previsible dels Jòcs olimpics d’ivèrn de 2030. La rega es clara: cal saupre estalviar e, a l’encòp, escampar la moneda per las finèstras.

• Jòcs Olimpics: A la una del n° de setembre de Prouvènço d’aro:“Li Jo Oulimpique d’Ivèr se faran dins lis Aup en lengo dóu païs, la nostro…». Un comunicat del Partit Occitan-Region Provença ditz non al debanament dins Aups d’aqueles Jòcs Olimpics: “(JO d’ivèrn de 2030 dins Aups:) Qué nani! Lei cagadas basta!» . Aquò se reglarà dins un combate de bòlas de nèu virtualas?

• Rescalfament: En 1850, lo nombre de glacièrs costat nòrd de Pirenèus èra de 100. En 2000, ne demorava 44 e ara, n’i a, a pro pena 17. Lèu, aurem tròp de dets per los comptar?

• Un pas en rè: Lo Barnièr remet pas en causa la lei actuala sul còs electoral en Canaquia. Mas pensatz que diguèt quicòm sus la decolonizacion del territòri?

• Gosses e gats: Al país del grand consum de hòt-dògs, lo president Trompeta se fa fòrt d’inventar l’istòria dels migrants que manjarián gats e gosses…

• Rasonable: Lo novèl primièr ministre anglés vòl reinicializar las relacions amb l’Union Europèa. Desfaire e faire es totjorn faire.

• Ensenhament e usatge: Un plan interessant article dins lo n° d’octobre del Peuple breton, signat per Gwenole Larvol, mèstre de conferéncia a l’Universitat de Bretanha Occidentala: «Es question d’ensenhar lo breton als escolans o de ne faire de locutors, que, entre la coneissença d’una lenga e son utilizacion volontària en contèxte minoritari, se trapa una diferéncia importanta.”

• Repression: La repression linguistica contunha. La Cort Administrativa de Fort-de-France ven d’anullar la deliberacion de la Collectivitat Territoriala de Martinica de 2023 que reconeissiá lo creòl coma lenga cooficiala de l’illa? .

• Una piòta de mai: Dins lo jornal de la Region Occitània, l’actritz Alexandra Lamy declara son amor fòrt per Cevenas e, doas frasas apuèi, merceja grandament sa professora d’art dramatic de Nimes que li faguèt pèrdre l’accent. Cossí aimar un país en escampant son biais de dire e sa lenga?

• Petanca: Mas ara, fin finala, tot va plan! Arrèsti de repapiar e de romegar que pòdi anar faire una partida de petanca amb las bòlas Massilia. E una partida de petanca, aquò fa bravament plaser!

Marquiset Roch