Vejatz coma son lo mond. An d’idèas vertadièirament estranhas, calugas, descabestradas.

Imaginatz que la Collectivitat de Martinica aguèt idèa de votar en mai de 2023 que lo creòl seriá, a costat dau francés (que son nom siá eternalament benesit dins la galaxia) lenga oficiala d’aqueste territòri. De segur qu’avián tròp festejat lo 175en anniversari de la fin de l’esclavatge autre grand apòrt de civilisacion dels francs dins aquestas tèrras.

Quina idèa, oficializar la lenga mairala de gaireben la populacion tota, mas quau s’i podriá pensar?

Aquela deliberacion eissida de tròp de libacions la refusèron de retirar. E lo prefècte, pecaire, obligat de portar l’afar au tribunau administratiu que l’annulèt aquel 3 d’octòbre.

Of, la civilizacion respira, la civilizacion progressa.

Ò meravilha de França que permet que sola la lenga de la minoritat siá oficiala, la lenga daus “metròs” o “zòrelhas”, solets monolingües francofòns de l’iscla que l’an de mairala. Lo creòl dels 90% autres es enebit d’usatge dins tota la vida publica e institucionala.

Aquí se vei clar que França defend plan las lengas minoritàrias !

Meravilha de la permanéncia dau colonialisme pur.

Quau es que ditz que tot se degalha !

La bèla justificacion francesa es que se fa dempuèi totjorn. Es tanben çò que dison los òmes que trucan la femna.

Jamai cambiar?