Opinion
Vestit fa pas monge
Diga! “Vestit fa pas monge, ni amulça canonge!” Avisa! ara los còlblancs se vestisson d’un blau de trabalh per anar au burèu e afortir fòrt e mòrt que eles trabalhan! Dison aquò la "gentrificacion" vestimentària… Bon, vos rassegure sulpic, se cargan pas la salopeta dau papeta crompada sus la plaça, au camion, sas aquela que s’estrechís a la bugada quand la fas bolhir e que te remonta leis alibòfis a la plaça de las galhas quand lèvas lo braç un pauc naut. Non, lor cau la combinason nauta cordura, made in París, a 250,00€. Sabe pas se capbordejan dusca a se perfumar a la susor dau front dels autres?… Rai dau patiment e de las enduras d’aqueles paures bogres que cargavan lo blau per se ganhar a pro pena lo de qué dau cada jorn qu’ara la mòda fòrça l’admiracion de totes sus aqueles vilandreses trentenaris que teletrabalhan dins la creacion, plan planet, lo mai sovent.
Aqueste biais de desgaunhar los vestits dau vesin es pas de uòi. Au nòstre siaguèron primièr los caçaires que se vestiguèron en Rambos de las Fòrças Especialas totas armadas confondudas. Mas coma se tiravan dessús coma de lapins, se carguèron puòi lo gilet irange, —camoflatge que cau pas colhonar!— que ne faguèt de còps lo braç armat d’aqueles fraires engiletats que flanquèron la jaunissa a Macron en 2018. Mas coma contunhan de se desquilhar los uns los autres, crese que van passar au gilet parabalas dau GIGN e aurem lèu de Robocòps tot plen la garriga per menar operacions de polícia contra los singlars.
Vòls que te diga? De monges, n’i a pas gaire e de canonges n’i a pas pus. Se ditz tanben: “Non son païsans totes los que pòrtan l’agulhada”. Levat dins de retrospectivas agricòlas, fa un brave moment que n’ai pas vist de coma aquò, de païsans. Lo mond càmbia, benlèu que devèm despolsar nòstres reprovèrbis?
Enfin, es çò que ne dise ieu …
La guinhada de l’IEO34. E, rau!
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Mon pair contava dins las annadas 1950 :
-Lo pair disset a son filh : tu, feras los paniers, ieu los vendrai"
Lo qual daus dos a ganhat lo mai d'argent? Plan segur que qu'ò es lo merchand, lo que los vend.
Apres lo merchand median minjava lo petit merchand avant de se far minjar per un pus gròs,tant e talament plan que d'annadas apres, demorava mas au plan internacional qu'una ponhada de merchands. Los petits son devenguts salariats e trabalhan d'un biais o d'un aure a nurir auela ponhada de merchands que son au-dessus daus estats, au dessus de la lei publica e leu tota la produccion sera a eus. Fera de las viandas de sintesas o a partir d'insectes. Chacun recebra un paubre salari; auran pus ren mas seran uros. Si falia autre còps daus adams (daus trabalhadors), aura sem tròp nombros. Aitau l'idéia de lo far disparaitre en los vaccinant, en poluant, en utilisant la corupcion, las messonjas, l'inversion de la valors (l'oneste es acusat de volar e lo bandit es protegeat per la lei).
Aitau se passa nòstra societat. La generacion Z aura pus ren mas sera urosa.
Es temps de se mobilisar emben los paisans, e tot los que denonçan aquel sistem Es temps de denonçar tots los sindicats e partits politics gangrenats per la corupcion.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari