Normalament, se ditz que los Estats-Units d’America an inventat lo show a l’americana e la Democracia. Per aquesta darrèra, es pas a l’Educacion Nacionala francesa que’vs van ensenhar que la purmèra constitucion d’un Estat democratic es pas la deus USA (1787) mes aquesta de Corsega (1755) que, ac cau tornar brembar, balhava lo dret de vòte a las hemnas.

E doncas de costuma los Estats Units son vists com un exemple de seguir en matèria de politica, au mens per çò que tòca l’organizacion. Es l’avís lo mès espandit.

Es vertat que los Americans son fòrça atentius au respècte de las libertats individualas, de las qualas la libertat d’expression, (mes tamben, ailàs, aquesta de possedir una arma), e que sovent expausan lor opinions politicas (sovent per un panèu davant lor ostau) sense de crànher d’estar la victima d’una ataca personala. Es de senhalar.

Mes totun, de qué pensar de l’espectacle lamentable que’ns perpausan ongan?

Se sap que’s pòt accedir au pòste de president en tot aver mens de vòtes que non pas son adversari, es atau que Trump batoc Hillary Clinton. De mès, es una campanha que se jòga a còps de miliards de dolars e cau aver uns amics miliardaris per poder saunejar a aténher la foncion suprèma, aquesta que’vs balha lo boton de la bomba atomica.

Dejà sabèm que causir entre duas personas a pas res de democratic. Vos cau votar per idèias que’vs semblan mens marridas, quitament se n’i a de l’aute costat que’vs aurén tanben agradat. Imaginatz un restaurant on caleré causir pas qu’un menut sancèr, sense i poder res cambiar.

Mes ara, lo pes de las personalitats es talament caricaturau que’ns demandam s’es un filme de Hollywood o vertadèrament un debat democratic. S’agís mès d’una emission de tele-realitat que non pas d’escambis filosofics sus la societat e las solucions que caleré aplicar per que lo monde sian uroses.

Los escambis son tan otratjants, las frasas com trucs de punh, que’s sembla mès un encontre de bòxa que non pas una competicion d’idèias.

Sabèm pas va ganhar, mes sabèm dejà qui a perdut: la Democracia, l’intelligéncia e lo progrès.