Opinion
De qué vos poiriái plan parlar?
Tèxte legit
Lo problèma principal del cronicaire es de cronicar e de trapar un subjècte de desvolopar per reténer l’interès del legeire e/o de l’escotaire. E ben, pauròt-a-s, aquesta setmana, sabi pas tròp de qué vos vau parlar, sus qun subjècte vos vau faire don de ma pertinéncia, de mon impertinéncia e de ma sagacitat. Vejam un pauc:
Jorns de caréncia: Financièrament, valdriá mai segon lo governament se trigoçar al trabalh puslèu que de recargar las batariás a l’ostal.
Personal: L’aeropòrt de Carcassona a pas qu’un contrarotlaire. Quand es absent, los avions an pas qu’una solucion: s’anar pausar a Tolosa.
Conflicte: Las rasons per qualas los coreans del nòrd pòdon èsser en conflicte amb los ucraïnians son plan foscas.
Dinastia: La jove filha Ju-Ae del dictator nòrd-corean (11 ans) deuriá succedir (un jorn) a son paire. Atal, totas las dròllas del país qu’an lo meteis pichon nom ne devon cambiar e es interdit de se vestir e de se cofar coma l’eiretièra: “aquò seriá un fenomèn antisocialista a l’impacte negatiu sus la societat”!
Escobilhas: Aqueles coreans del nòrd an arreglat lo problèma d’estocatge de las escobilhas. Las van escampar per via aeriana cò dels vesins!
Sòmi: Lo sòmi fòl de Russia es de tornar fargar l’URSS.
Presidenciala americana: Anam aver quatre ans per i tornar e ne véser las consequéncias. Visca la democracia!
Lo grand uèit: Lo Mbappé es pregat de revisar las règlas del fòbal. Dins lo Classico, s’es fait pescar uèit còps fòra-jòc.
Cranc blau: Lo cranc blau s’espandís en Mar nòstra, dins l’estanh d’Aur, en Corsega… Los còrses pensan cambiar las conservariás de peisses en conservariás de crancs blaus!
Oltra-mar: França-2 a consacrat un Grand Échiquier a las riquesas culturalas dels territòris franceses d’oltra-mar. Se sap pas quora se farà una emission dedicada a las culturas non-francofònas de la metropòli (se jamai l’idèia lor i ven).
Quista: La Rachida Dati vòl faire pagar las gens que dintran dins la Catedrala Nòstra-Dama a París. Cossí destriar un torista d’un fidèle? Notatz, ça-que-la que i a ja moneda de daissar quand vas dins un estadi-temple del rugbi.
Infernal: L’arquevèsque de Tolosa a fait dire una messa per se parar de las maquinassas qu’an trevat las carrièras de la ciutat mondina sul tèma Las pòrtas de las tenèbras.. Èra per lutar contra aquela vesion infernala! Mas sa religion jòga pas ja sus la paur d’aquel Infèrn? Lo prelat auriá plan aimat menar lo Minotaure al Mata-buòu?
Croniquet Roch
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Quand l'òm sap pus de que parlar, i a totjorn una nhòrla de Panazo (de las nhòrlas de Panazò, publicats per l'IEO). En veiqui v-una:
Lo petit Trauca-Plais anava au catregirme. Un jorn lo curet li damandet de li dire qual jorn era mòrt Nòstre Senhor Jesus Crist.
Lo gamen se calculet e disset:" e ben mossur lo Curet, lo sabia pas malauda". Lo brave curet en manquet ne'n tombar de cul. Partiguet còpsec chas lo pair dau petit Trauca-Plais.
Escotatz-me, pair Trauca-Plais, quò n'es pas possible. Vòstre gamen a pas polgut me dire lo jorn que Nòstre Senhor moriguet..
Lo pair Trauca-Plais respondet : "Quò m'estonna pas, nos ne prenam pas lo jornau"
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari