Tot a una fin: los Jòcs Olimpics coma las campanhas electoralas! An pas jamai estudiat los especialistas d’ont venián los Franceses… Nascut a Houston, Texas, John Gray, un Estatsunidenc que viu en Califòrnia, venguèt celèbre en 1992 amb la publicacion de son best-seller:Los òmes venon de Mars, las femnas venon de Venus.

De segur, sabia pas que França existissiá o, a l’epòca, aviá pas rescontrat cap de Francés. Si que non, auriá sabut, coma ieu, coma vos, que las gents que demòran dins l’exagòn son d’immigrants venguts de Gran Bretanha o dels Estats Units d’America.

La campanha electorala estatsunidenca ne pòrta la pròva un còp de mai que foguèt seguida per un nombre important de personas e qu’avián gaireben totas lor candidat. Votavan pas ça que la… Avètz podut observar un fenomèm identic amb la familha reiala de Gran Bretanha: après aver descapitat lo rei de França, sa femna… e qualques milierats d’autres per far bona mesura, pendent la revolucion borgesa de 1789, festejan la familha reiala anglesa a cada còp que la possibilitat lor es donada… Aurián coma coma un besonh de resacat que ne seriái pas estonat!

Ara que la messa es dicha, nos van abeurar, los jornalistas e comentators divèrses de las rasons de la victoria de l’un e de la desfacha de l’autra. E soi segur que i consacraràn mai de temps qu’a las eleccions legislativas exagonalas…

E òc, l’aiga es pus vèrda enlòc mai!

D’un punt de vista exagonal, l’eleccion del 47n president estatsunidenc es, per una majoritat de Franceses un non-eveniment. L’estrambòrd qu’aviá suscitat Obama èra absent aqueste còp en França.

Vertat es que las otranças verbalas, las messorgas a fanègas, las vertats alternativas, las remarcas racistas e omofòbas, las posicions virilas, las insultas ad personam, lo fach que siá condemnat per la justícia de son país, etc. e l’ego desmesurat del candidat dempuèi qu’es dintrat dins l’arena politica fasiá aparéisser, a còps, la vicepresidenta Kamala Harris, candidata de substitucion en plena campanha, un pauc coma un galina que ven de trobar un cotèl — o coma “la cabra de Mossur Seguin” per los que l’an conegut! S’es totjorn, me sembla, refusada a manejar l’insulta a l’encontra de son adeversari levat per dire que son comportament èra faissista — e la vertat pòt pas èsser una insulta!

Que los Ucraïnians se fagan espotir per las bombas d’un psicopata que demòra Moscòu o que los Palestinians moriscan jos las de “tsahal” per çò qu’un primièr ministre —qu’a qualques comptes a rendre a la justícia de son país— ten pas pus compte del motiu primièr de la ripòsta a un acte terrorista òrre d’una amplor sens egala dempuèi gaireben la creacion de l’estat d’Israèl… tot aquò, los autres —“lo bon pòble”—se’n chautan del moment que pòt far son lòto, gratilhar sas bilhetas de lotariá e far l’amor amb sa femna o son amiga lo dissabte de ser.

E, ça que la, o ai ja dich mantun còp dins aquesta cronica: “Cal pas jamai doblidar que quand los Estats Units tossisson, Euròpa —e pas solament Euròpa!— a la gripa.

Personalament, dins ma tebaïda gascona, ne teniái per la representanta de sang mesclat e tròbi qu’a menat un combat digne e de qualitat fàcia a un adversari que messorgas e grossieretat escanan pas.

Ara, los comentators exagonals, los politicians donan lors analisis a posteriori… Es aisit de jogar als endevinaires… après!

Ieu —mas ieu compti pas— çò que me tafura lo mai es que venon d’elegir un mèstre après messorgas… e autras “qualitats” descrichas çai-sus per lo qual lo mot “democracia” existís pas a priori e qu’a ensajat de far un còp d’estat sens èsser embestiat per la justícia — un fum de los que l’an cregut son en preson!

Tossisson, los Estatsunidencs… La gripa se sarra de nosautres, se sarra d’Euròpa amb de formacions de drecha extrèma al poder o sul punt de i arribar, sens doblidar republicas “illiberalas”.

Avèm pas a nos regaudir quitament se, en cò nòstre, avèm agut e avèm encara de politicians qu’exerçan de responsabilitats quand son “en afar” amb la justícia e que dison que son “innocents tant que son encara condemnats per la justícia”… Ne coneissètz totes!