A pas escapat a degun que l’eleccion de Trump va cambiar un hum de causas aus Estats Units, mes tanben au nivèu internacionau, e es meslèu aquò que ns’interèssa.

A calgut aus Americans causir entre dus programas desparièrs que pertocavan l’ortada, las talhas, l’immigracion, la politica internacionala, la santat, los transportes, lo climat, etc, e doncas sosténguer idèas que partatjan pas automaticament per n’apujar d’autas que’us agrada en se basar sus promessas d’actors hollywoodians. N’i a qu’apèran aquò “Democracia”, comprengui pas perqué, mes bon ...

I a totun un petit detalh qu’a pas pareishut important en Euròpa aus redactors d’informacion mes qu’ac es, es que lo Donald prometoc “d’acabar la guèrra en Ucraïna per una simpla telefonada”.

Cau tradusir per “Deishar de balhar mejans a l’armada ucraïniana per qu’accèpte la perpausicion d’estanc deus combats e de discutida hèita peu poder rus dempuèi genièr de 2024”.

Aquò’s tanben un auta “detalh” que los especialistas de platèus an jutjat pas grèu de’ns comunicar e que doncas gaireben degun sap pas. Zelenski s’es arretrobat davant una causida mauaisida. Sia estancar lo masèl e acceptar de discutir dambe lo poder rus sus la basa de la situacion actuala on son país perd territòris, sia contunhar en esperar tornar conquesir aquestas regions, en tot saber qu’es pas segur e que cada jorn que passa vei se morir monde joens e fòrças vivas de la nacion. Una mena de “quiti o doble” mortau. Aparentament a causida la dusau solucion.

Mes la question es de conéisher lo pes deus vendeires d’armas americans dens los conselhs amistoses deu govèrn estatsunidenc que’u sosteng dempuèi la debuta.

La dusau inconeguda de l’equacion es de saber s’aquestes mercadièrs de canons poden pas hèr tanben pression sus Trump per que cambie son biaish de pensar e tradisca sons electors. Ma hidança de cap ad aqueste personatge es mens hòrta que non pas de cap au poder de núser deu complèxe militaro-industriau que denonciava Eisenhower dens una famosa parladissa (que conselhi a cadun d’escotar) per la fin de son mandat.

De qué cau esperar? L’arrèst de la guèrra es la prioritat d’un punt de vista umanitari. Quitament se la television nos muisha los volontaris prèsts de balhar lor vida per lor patria, n’i a tanben fòrça qu’ensajan d’i anar pas, en se hent discrets o que son estudiants après 30 ans per evitar la mobilizacion. Soi pas segur au cent deu cent que lo sentit guerrièr sia totau en çò de’us que parlan lo russe, qu’espian la television russa, qu’an un paire russe e una maire ucrainiana, etc …

Jogar per la vida d’autes sus una arrevirada de la situacion es mès qu’aleatòri e un arrèst deu huec seré planvengut.

Demòra pas que de saber s’una promessa electorala d’una persona coma lo Donald Trump serà tenguda o se n’èra pas qu’una bragardisa de mès.