Dempuèi l'eleccion de Donald Trump a l'Ostau Blanc, las informacions vengudas d'Ucraïna se honhan au cledon. En resumit, lo navèth elegit a prometut de botar una fin ad aquesta guèrra dambe una simpla telefonada. Sabèm pas, solide, se s'agís pas que d'una promessa o d'une enveja vertadièra que lo complèxe militaro-industriau s'i escaderà pas de cambiar.

Las darrièras informacions serèn meslèu chepicantas. A despart deu hèit que lo tarrible Manuel Valls a anonciat que "se calèva aprestir a la guèrra ", una frasa de la quala cau pas ténguer compte vist son autor, tot sembla anar mès viste.

L'utilizacion d'armas ara permetudas peus Americans a causada una responsa hòrta deu poder rus que vòu muishar los muscles, benlèu de cap a son opinion publica e miaça los païses qu'ajudan Ucraïna, en tot suggerir que las armas utilizadas n'ac podón pas estar sense l'ajuda de tecnicians estatsunidencs, çò que, segon uns expèrts d'armament, es pas impossible.

Lo govèrn suèc a distribuidas capsas de "subrevida en cas de guèrra" aus sons estatjants. Los païses vesins se disen prèsts a tota eventualitat e lo ministre francés de l'armada se vòu pas tanpauc muishar rassegurant.

Es complicat de legir dens lo marc de cafè, mes vesi pas que duas solucions a çò que tot aquò nos deisha presagiar.

Sia vam de cap a un conflicte generalizat, en tot saber que d'un costat los pòbles vòlon la Patz mes los qu'an lo poder an benlèu un aute vejaire,

Sia son totis a s'en·holiar pr'amor que saben la fin de la guèrra, prometuda per Trump, es a arribar. Lo poder rus perpausèc parladissas de patz dempuèi dejà 11 meses e se lo Donald hè çò que ditz, calerà lèu a Zelenski se sietar a la taula de negociacions. Doncas cau que las pausicions militaras sian pas tròp desfavorablas a Ucraïna.

Clinarí meslèu deu dusau costat, benlèu pr'amor que soi un optimista incorrigible, mes tanben pr'amor que pòdi mauaisidament imaginar un conflicte entre Estats que possedissen l'arma nucleara.