Diga! Un còp que vos seretz arrestat de beure, qu’auretz fach la vessina freja e tibat l’artelh, doas solucions s’ofrisson a vos. Primièr, l’enterrament a l’anciana en anant noirir e laurar amb l’òs bertrand, dau costat de Santa Repausòla, aquela tèrra nòstra qu’i èretz tant talament estacat. Un chic archaïc mas classic, autentic e elegant, amb los amics que seguiràn la caissa per lo carrairon dau cementèri en charrant segon la sason dau darrièr sulfatge, de la dobèrtura de la caça o de la sortida dels campairòls. N’i aguèsse agut…

O ben, poiretz faire un fum de tèsta, lo darrièr, en vos fasent encendrar au forn banal de vòstra vilassa. E, causiguèssetz aquesta formula de mai en mai de mòda, ofririatz un copacap complicat a vòstres eretièrs… Que faire de l’urna e de tota aquela potassa?

Çò mai senat seriá de ne femar, d’aquelas cendres, un aubre bèl o los patanons de l’òrt per se congostar d’unas fritas puòi mas dins lo caluquitge ambient fariatz mòstra d’una manca d’originalitat desconsolanta. Benlèu çò melhor per tocar lo cèl seten es d’i anar a de bon, dins una fusada, coma vos lo prepausan d’unas firmas especializadas, americanas mai que mai, que fan virar los colhons en orbiti ad vitam æternam e vos fan pagar plan car un anar sens tornar. I podètz tanben pojar, au Paradís dins un fuòc d’artifici! Meton çò que sòbra de ta persona polida dins una darrièira cartocha, t’i sacan una alumeta onte me pense e zo! siás partit per un ramelet final espectaclós e un darrièr espet. Aquí, mercé de fotre pas lo fuòc a la garriga. D’unes tanben, causisson de se faire saupicar illegalament dempuòi la torre Eiffèl per enfectar un darrièr còp los paumons de la parisencalha. Grand ben lor faga!

Mas, la darrièira tendéncia es de faire escampilhar sas cendres per los amics dins un Pargue Disney. Solide, vos espèran pas e vos caudrà dintrar en tota discrecion, dins lo calçon dau companh o las braïetas de l’amigueta que riscan de se faire paupejar d’en pertot per la Securitat. Dins l’òrle de la berreta aquò marcha ben tanben qu’es coma aquò que fasiái passar lo tiratap en doça a l’Estivada. Los agents de uòi son pas formats a las berretas…

Un còp en çò de la mirgueta aurelhuda, vòstra darrièira demòra poirà èsser l’Ostau de las Trèvas o la Torre de la Terror per i espaurugar la practica e, se preferissètz far a pipa-redòla per tot lo demai de vòstra mòrt, embarcaretz sus la Ròda de la Desfortuna: lo Uòch Bèl.

Vòls que te diga? En tot cas, mercé de daissar pas rebalar d’en pertot vòstra polsa ultima per donar pas mai de trabalh a la Cendroseta qu’a pas besonh d’aquò pauròta.

Enfin, es çò que ne dise ieu …

La guinhada de l’IEO34. E, rau!