Aquesta setmana escriguèrem pas al Paire Nadal, es lo Paire Nadal que nos escriguèt. E foguèrem subtats quora reçaupèrem lo mèl. Figuratz-vos que nos acordava d’anar furetejar dins las sacadas de messatges que veniá de reçaupre. Foguèrem tras qu’uroses dempuèi d’annadas que o li demandaviam!

Demèst la molonada de letras qu’espinchèrem, vaquí pels legeiras e legeires del Jornalet, las tres que de legir plaser prenguèrem:

***

Brave Papeta Nadal,

Te demandi un polit present: pren-me amb tu la nuèch de Nadal.

Potonetons d’Ipolita - 10 ans.

***

Adieu Paire Nadal,

Ieu te demandarai pas la luna coma present. Pas la pena de ne risolejar dins ta barba! Aqueste an, pecaire, es just una triqueta magica que me caldriá. Pas una triqueta de farlabica mas una tras que solida. Una triqueta que cambiariá la sopa de morre en sopa de convivéncia. N’aurai de besonh maites còps dins ma vida!

Una abraçada.        Nadià - 25 ans.

 ***

Paire Nadal, plan lo bonjorn,

Un paire Nadal pòrta una barba blanca. Ieu, soi paire, ai una polida barba, mas es negra. Sabi pas cossí m’emblanquir la barba per me far Paire Nadal. Ai tot ensajat mas i arribi pas. As una idèa? S’as un momenton de liure, pòdes me mandar la recèpta? Me fariá bravament plaser.  Mercé a tu e Crane Nadal!

Amistats Nadalencas.    Laurenç – 40 ans.

  ***

Parlèrem de la tresena letra al Paire Nadal que nos afortiguèt que, aprèp las fèstas, respondriá segurament al Laurenç:

Car Laurenç,

Pas de lagui! Pas de lagui! Espèra... Espèra... Fai fisança a las annadas per ganhar la barba blanca. Seràs pas deçauput!

Paire Nadal – 75 ans.