Ongan vau dintrar en çò mieu per Nadal. Es una jòia tornar veire la maire e totes mos èssers cars. Ça que la, Brasil cada còp es una leiçon de bolsonarisme. E òc, quitament se lo Bolsonaro ocupa pas mai lo Palais del Planalto a Brasília, sas idèas obsolètas contunhan de s’espandir, al mens dins lo mond numeric. E o sabètz plan: çò que se passa dins lo numeric, demòra pas dins lo numeric.

Quinze ans fa, quand venguèri viure en Euròpa, Brasil èra un país que espelissiá: la sieisena poténcia mondiala, amb un pòble virat cap a l’abondància e a l’espèr, amb Lula al poder. Çò que m’èra pas previst, almens per ieu, èra de veire lo Brasil regredir cap a de pensadas e d’epòcas de las mai negras: aquelas de la dictatura militara e de l’extrèma drecha. E tot aquò s’es passat amb l’ajuda indispensabla dels algoritmes e de la BA, la Bestiesa Artificiala. Ara Lula es tornamai al poder mas, per contra, lo terrenh es poirit.

Alavetz, un estudi recent, realizat pel NetLab UFRJ (Universitat Federala de Rio de Janeiro) e pel Ministèri de las Femnas de Brasil, investiga la preséncia de discorses misogins sus 76 289 vidèos de YouTube. L’òdi de las femnas es vengut un produch — e de gents ne profièchan. La recèrca menada a revelat un vertadièr mercat de la misoginia sus YouTube: los discorses d’òdi contra las femnas non solament se propagan, mas son tanben monetizats.

Valent a dire que l’80 % de las cadenas analisadas recebon d’argent de YouTube gràcias a la publicitat. En mai, aqueles creators de contenguts an creat de novèlas formas alternativas de monetizacion, coma las demandas de dons e los viraments bancaris, especialament via lo crowdfunding e las criptomonedas.

Los cercaires an concentrat lors esfòrces sus YouTube pr’amor de la popularitat de la plataforma en Brasil, ont compta mai o mens 142 milions d’utilizaires e representa a l’entorn de 15 % de tota la produccion audiovisuala consumida pels brasilians. Ça que la, lo concèpte existís tanplan sus d’autras plataformas.

Las comunautats d’influenciaires profièchan de vidèos qu’atacan, umílian e desumanizan las femnas, naturalizant atal los comportaments violents sus e fòra internet. Aquesta violéncia despassa l’ecran e penètra dins la vida reala. Es aquí que la lucha ven essenciala! La vision del mond es ara codificada al dintre del numeric, abans d’espelir defòra.

E per vosautres, en çò nòstre, aquò vos concernís pas?

Me permeti d’anar mai luènh: çò que se fa al continent american arriba lèu-lèu aquí en Euròpa, que ja sembla un terren fertil per aquestas idèas.

Es urgent de regular los rets socials. L’objectiu es de dobrir un dialòg amb los poders publics e d’afortir lo debat juridic ja entamenat sus aqueste subjècte. La necessitat de reglamentar al mai lèu los discorses d’òdi deu venir una prioritat, tot coma l’importància de debatre amb la societat e d’inclure d’autres actors socials que, sovent, participan pas a la lucha contra la violéncia facha a las femnas o se rendon quitament pas compte del problèma.

L’urgéncia es tanben de rivalizar amb los contenguts actuals sus las rets socialas en favorizant de materials alternatius e de qualitat. E, d’un autre costat, cal negociar dirèctament amb los “Sèt Fantastics”, (Google, Apple, Facebook, Amazon, Microsoft, Nvidia e Tesla), que favorizan la difusion de discorses d’òdi, especialament pertocant la remuneracion d’aqueles contenguts.

A nosautres de far montar l’audiéncia dels projèctes en lenga nòstra e de faire las plataformas plan pagar a nòstra chorma, coma Lo País Invisible. Bonas fèstas e a l’an que ven. Mercé!