Del temps que lo buòu romia, dormís e ronca al pè de la grèpia nadalenca (es pas de creire çò que pòt engolir un buòu long del gròs sopar e del ressopet), l’ase i va de quauquas asenadas pescadas dins l’actualitat (o pas). Anem, brama-nos, Ali-Borron, ton vejaire sus l’actualitat!

• Fals vin caud: Vist dins una espiçariá carcassonesa lo lançament d’un produit novèl: un chuc de rasim especial de faire caufar fins a 60° abans de lo beure (e, dison, s’es tròp fòrt-?-, s’i pòt ajustar aiga). A aquela beguda novèla, preferarem totjorn la tisana de gavèls! E se pòt totjorn trapar quauqua cantina d’ipocràs que son gost revèrta de vin caud mas freg!

• Dissolucion e mot-valisa: Dins dissolucion, se trapa lo mot «solucion», levat qu’es de plan mal agantar.

• Censura: Se pòt constatar qu’aquela mocion de censura balha una tièra d’emocions novèlas e de frejolums de questionaments rapòrt al devenir politic francés.

• Quadratura del cèrcle: A tres grops que jògan al «dos contra un» alternativament, sèm plan luènh de trapar la sortida de l’albèrga. Dins una albèrga vièlha, demandarem de vin…

• Barradura: Lo barnum de Barnièr es barrat. Ne demòra que posca e nièras…

• Transparéncia: Plan del quarantenat de ministres del Barnièr demorèron inconeguts e transparents. Se ditz que la presidenta de l’Amassada nacionala, s’èra fait faire un trombinoscòpi per saupre s’èra un ministre o un simple deputat que se presentava.

• Centralizacion: Es totjorn atal… A un moment, lo Partit Socialista doblida qu’es(foguèt) un representant de la classa obrièra e qu’es d’esquèrra per virar subran cap al centre, veire al-delà…

• Mercosur: Sembla plan que siague pas un mercat segur!

• Engatjament: Vista la manca d’ensenhaires, l’ancian president Nicolau Cèrca-s-i envisatjariá d’obrar dins la Granda seccion d’una mairala (en contunhant de pensar que i a pas grand causa de faire, lo pauròt!). Per lo mercej ar d’aquesta iniciativa, se li a fait present d’un braçalet.

• Pas de fèsta: Me pensavi qu’ongan se festejariá pas Nadal que lo mes passat anoncièron qu’aviá pres la retirada. Ai pas degut tot comprene: èri pas de servici aquel jorn!

• Òme-Nadal balès: A Vilalièr, comptavan de faire susar la camisa a l’Òme-Nadal! Per preparar sa virada, avián botat presents dins los gòrbs de las vendémias: los gòrbs de fèrre d’un còp èra que pesavan un ase mòrt. Sustot que doblide pas de botar un borràs entre l’esquina e lo gòrb; autrament, va patir quicòm un còp la virada acabada.

• Banana: A! s’èra estat una banana del Segalar venduda a prètz d’aur coma òbra artistica, i auriá cap de problèma per la programacion de la Nov’Estivada!

• La piòta: Una frasa del jornal castelhan Marca aprèp los penaltis mancats per Quilhan Mbappé: «Una piòta ten mai de fisança abans Thanksgiving que Mbappé sus un tarrenc»!

• Bretons rascanhas: La presidenta de la Region País de Leira vòl trencar dels 3/4 las subvencions culturalas (en realitat 73%) https://www.francebleu.fr/infos/politique/baisse-du-budget-de-la-culture-en-pays-de-la-loire-une-petition-reunit-plus-de-60-000-signatures-6928902 . Lo departament de Còsta d’Armòr envisatja d’esparpalhar lo fons de la bibliotèca de Cavan que recampa especificament obratges en breton.

• Lo Breton pèc: Carton roge pel sosten de l’Estadi de Brèst, torista a Carcassona, que li prenguèt l’idèa d’empegar sus ma veitura (perqué la meuna?) un pegasolet sus Brèst en Copa d’Euròpa, amb gwen-ha-du. Presi plan lo percors de l’esquipa dins la competicion ont es melhor classat que lo PSG, mas èra pas una rason per que desempègue lo pegasolet dels Dracs catalans! E la solidaritat internacionala, camarada? Se l’aganti (çò que m’estonariá), condemnarai lo breton a escotar una orada de bagad ont los biniós seràn remplaçats per de sacs de gemècs. E per gemegar, te lo farai gemegar lo tipe!

Nadalet Roch