Lo furry fandom es una comunautat internacionala que li agrada l’antropomorfisme, qu’avèm ja explicat abans. Aquesta subcultura rica e diversificada tròba sas rasigas dins mantun corrent artistic e cultural. Anam començar de parlar de sas originas, de sa creacion, de son istòria, puèi parlarem de la ‘‘fursona’’ l’identitat pialuda d’aquestes apassionats.

Las originas, annadas 70-80:

En fach, lo furry tròba sa sorga dins lo crosament de mantuna influéncia culturala mediatica.

Primèr dins lo cinèma e la literatura de sciéncia-ficcion. D’òbras coma La planète des Singes(1968) e lo roman Watership Down (1972) (l’istòria d’un grop de conilhs en quista d’una tèrra nòva per s’installar après la destruccion de lor garena pels umans), popularizèron d’istòrias ont los animals jògan un ròtle central. De dessenhs animats coma Robin Hood (1973) de Disney, Bugs bunny o Mickey Mouse aquí captivèron un public mai jove. E pels adultes amb de tèmas mai madurs, d’òbras independentas coma Omaha the Cat Dancer e autras bendas dessenhadas dichas underground.

Aquel interès per aquestas formas d’expressions balhèt pauc a cha pauc naissença a una comunautat de fan: lo fandom furry[1].

Primièras convencions, annadas 80-2000:

Los primièrs acampaments a l’entorn del furry fandom aguèron luòc dins l’encastre de convencions de sciéncia-ficcion, convencions geek, coma las TGS en França.

En 1989 la primièra convencion dedicada exclusivament als furry[2] es organizada en California: la ConFurence 0. Aquestes eveniments marcan la debuta e l’estructuracion d’aquesta subcultura. La creacion de revistas illustradas e de clubs, permeton als artistas e escrivans de partejar lor creacions a l’entorn dels tèmas antropomorfics. Aquestes acamps permeton a la comunautat de créisser e d’aculhir de mai en mai d’artistas e pro lèu de creators de costumes.

Amb l’arribada d’internet, la comunautat creis encara mai lèu. De forums e comunautats en linha se dubrisson coma FurAffinity e DeviantArt, que permeton als furry del monde entièr de se connectar e d’escambiar sus lor passion. Foguèt tanben l’endrech perfièch per se balhar de claus per la creacion artistica de costumes de cosplay o mai aicí per la creacion dels vestits furry: las fursuits, que vendràn lèu l’emblèma de la cultura furry.

Una comunautat diversificada e inclusiva, annadas 2000 cap a uèi:

Uèi lo furry fandom es reconegut per sa creativitat e sa dubertura. Crèan bravament d’òbras d’art, d’istòrias, de musicas, de dessenhs etc. La màger part del temps aquelas òbras son partejadas dins de convencions coma l’Eurofurence o suls malhum socials coma instagram. Lo furry fandom es tanben un espaci segur per la comunautat LGBTQ+ e ofrís un luòc d’expression e de sosten pels membres. Un fum de grops de discussion suls malhums socials Discord e Telegram permeton als furry de far de rescontre. D’associacions se son creadas e organizan de sortidas e d’acamps al bar, per carrièra, o sus de sortidas culturalas tanben.

Fin finala d’òbras mediaticas coma Zootopia (2016), Beastars (2019) o Les Bad Guys (2022) permetèron al grand public de s’apropriar las tematicas tan caras als furry.

Es aital que lo furry fandom nasquèt d’una mèscla d’influéncias artisticas e de passions comunas, que s’es impausat coma jos-subcultura rica, unica e plena de solidaritat, mas ara anam parlar de la Fursona e de sa creacion.

La fursona, qu’ès aquò?

Lo terme Fursona es eissut de la combinason dels termes angleses: Furry e , e fa referéncia al personatge creat o a l’identitat incarnada per una persona del fandom. Las fursonas fan partida integrala del fandom. Son mai que mai ligadas al dessenh furry. La màger part dels furry n’an un e s’i identifican. Las fursonas se basan generalament sus una espècia animala, adaptada per la persona que jòga son ròtle. Om pòt se representar se meteis amb de caracteristicas particularas, o crear un personatge completament fictiu. La Fursona pòt aital èsser un alter-ego, venir d’un animal totèm o tot simplament d’un animal que nos agrada plan.

Per la creacion del personatge, o per lo far viure, los que son blocats per la representacion de lor idèia o que sabon pas dessenhar, pòdon demandar a d’autres artistas de lo lor dessenhar pel biais de commissions o de crompar de personatges ja creats los adopts. Per far partida de la comunautat es pas necessari de n’aver un, ni mai d’aver una Fursuit, lo vestitque correspond al Fursona creat. Èsser furry, es pas jogar un ròtle, es tot simplament aimar l’antropomorfisme.

Cossí crear sa Fursona?

Abans de començar, qual saber que lo sol limit es la vòstra imaginacion. Per trobar d’idèias, fòrça documents existisson sus internet. Mas atencion! Es pas per de qué lo personatge es fictiu que pòdes far de causas immoralas.

1° Causir l’espècia que vos agrada mai:

Podèm trapar un fum de causas diferentas. Vos podètz basar sus d’espècias animalas viventas o desaparegudas, de creaturas mitologicas, dragons, centaures, e i apondre de caracteristicas particularas, alas, banas... E aital crear d’espècias ibridas: un lop amb las banas d’un marran... Un cat, un verdon o un dragon pòdon far una bona basa. Mas vos podètz tanben basar sus una planta, un pokemon, una maquina... en fach: Tot-çò-que-vos-agrada!

2° Dessenhar sa Fursona:

Ara que l’espècia es causida la vos cal apropriar.

Causir las bonas color es important. Amb totes los O.C.[3] qu’existisson ara, las colors tanben pòdon ajudar a identificar una fursona. Podètz tanben aital jogar suls marcatges del pelatge, de las escaumas, de las plumas...

Causir los atributs: mascle, femèla... aurelhas grandas, coa pichona, d’alas, de campairòls blau sus las banas...

Se ès digitigrade (que camina sus sos dets), plantigrade (que pausa la planta tota del pè sul sòl), o feral (a quatre patas).

Puèi passatz als atributs culturals: bandana, pensament, tatoatge, crotz occitana...

3° Li balhar un caractèr e una istòria:

grand e batalhaire, pichon mas aventurós... Lo mai simple per un alter ego es de calcar la siuna pròpra identitat e modificar de causas viscudas e los traches de caractèr.

E fin finala cal acabar per li balhar un nom.

Per conclure, lo furry fandom es una comunautat (que li) agrada l’antropomorfisme. Es una comunautat dubèrta que permet a totes de s’exprimir e crear d’òbras artisticas culturalas. Aver una fursona permet de s’identificar, de se questionar e permetre de nòvas rescontres. De personas timidas o autistas utilizan aquel mejan per s’exprimir a travèrs del fursona, e de còps dins la vida vidanta amb las Fursuits. De luòcs de rescontres coma las convencions o los grops suls malhums socials e forum permeton a un fum de personas de partejar lors òbras artisticas e far de rescontres. Fin finala lo furry fandom es un escapatòri a la crudeltat de la vida vidanta, un luòc segur per los autistas e los LGBTQ+, e un luòc d’expression solid e crane.