Opinion
Bona annada!
L’an novèl pica al portal. La setmana qu’arriba va gisclar un pauc de’n pertot, en presencial coma en virtual, la “Bona annada”. Que cal entendre per “Bona annada”?
Caduna e cadun i bota çò que vòl mas, per ieu, seriá de sovetar als estatjants de la planeta, en primièr, la santat. Una santat de fèrre per totas e totes, nenòtas coma nenons, joves coma mens joves, vièlhs coma mens vièlhs... De poder manjar a sa talent. De poder aver d’aiga per beure, d’aiga linda non trafegada per poder viure e subreviure. D’aver una teulada per se remisar e poder dormir a l’abric; aparat de la nèu, de la pluèja, del vent, del solelh... Un ostal per poder se caufar, se rescaufar. E puèi pro de moneda per poder far fàcia als besonhs essencials. Anatz me dire: tot aquò son banalitats! Benlèu mas banalitats essencialas!
Sovetar la bona annada seriá tanben desirar un fais d’amor e d’amistat a totas e totes. Seriá tanben de desirar la patz. Autre ben preciós jamai aquesit, jamai ganhat. Qual èsser uman senat desirariá pas qu’en 2025 las guèrras s’acabèsson que siá en Euròpa o en Orient Mejan o dins lo Monde tot.
Sens oblidar la libertat d’anar e de venir e la libertat del dire. Tròp de femnas e d’òmes de per lo Monde son encadenats, embarrats, castigats, nafrats, per lors idèas, lors punts de vista, lor biais de viure, de dire e de pensar. Convivéncia nos manca!
Sovetar la “bona annada” a la planeta tota es soscar al rescaufament climatic, al trebolament de l’aire, al trafegament de l’aiga... Benlèu que de i pensar tre lo primièr jorn de
l’an, es ja quicòm.... Una ajuda? Benlèu? Qual sap?
Sens oblidar la “Bona annada” pel Jornalet. Li sovetar belcòp mai de moneda per poder viure coma se dèu, butar mai en abans encara sas recèrcas d’entresenhas jornalisticas e bastir projèctes novèls amb de mai en mai femnas e joves que li escrivon cada jorn... Per assabentar sas legeiras e legeires suls eveniments bèls de la planeta, amb cronicas, enigmas, sondatges, jòcs de mots... e un clapàs d’autras activitats novèlas encara... lo tot en lenga occitana. Es çò que desiri al Jornalet per 2025!
Bon cap de l’An!
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Aquò es la filosofia de deman. Tot un chacun es mestre de sas pensadas, de sas ideias, de sas acions mas es pas mestre d'aquelas daus autres. Chascun es mestre de sa Republica e pòd imaginar qu'a un ministre dau budget, de sas afars professionalas o personalas de sa cultura...A tamben un ministre de las relacions exterioras. L'exterior quò es l'autre, (parents, frairs, sòrs, cosins e totas las relacions professionalas o personalas).E per aquò a besonh de diplomacia mas qu'ò es pas ensenhat.
Es de l'amor incondicional que se tròba dins sa consciença. e dins son còr? Si l'òm s'ama, si l'òm ama sa vita, son trabalh, si l'òm es plan dins son còrps, quò es que l'òm es sur lo bon chamin, lo chamin de l'amor, de la santat, de l'abondança tant materiala qu'espirituala. Tot vai e la vita es pus aisada; las relacions emben los autres son ensolehadas e luminosas.
Pas besonh d'un especialista, un professional, un scientific, un filosofe. Sem tot au còp; sufis d'aver fisança en se. Si l'interior es uros, alaidonc l'exterior zo sera mesme los dirigeants.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari