Las tecnologias de telecomunicacion mobila se succedisson e pòrtan cada còp mai d’eficacitat per una frequéncia donada. Amb cada generacion de ret telefonic, l’utilizacion de l’espèctre es optimizada: mai de telecomunicacions simultanèas, mai de debit Internet, laténcia redusida.

L’acumulacion de las tecnologias e lo renovament dels terminals fan que los operators consacran una part de lors frequéncias per un nombre plan feble d’utilizaires. Amai, las frequéncias de la 2G 900MHz e 1800MHz son de frequéncias que pòrtan luènh. Per vulgarizar, mai baissa es la frequéncia, mai luènh va e penètra los materials coma las parets. A l’origina la frequéncia 900 èra desplegada per ofrir la cobertura e 1800 la capacitat coma en vila. En efièch, en creant de cellulas, d’aquí lo tèrme telefòn cellular, mai pichonas òm pòt absorbar lo trafic d’una zòna plan poblada.

Pro de tecnic.

L’operator Orange comuniquèt la setmana passada sus las datas de fin de la 2G. Indica que nòu departaments occitans serviràn de pilòts per aquesta fasa.

Lo 9 de març de 2026 los departaments seguents auràn pas mai de servici de segonda generacion:

• Arièja (09)
• Garona nauta (31)
• Gèrs (32)
• Lanas (40)
• Òlt (46)
• Òlt e Garona (47)
• Pirenèus Atlantics (64)
• Pirenèus Nauts (65)
• Tarn e Garona (82)

Per la rèsta del territòri metropolitan francés la copadura en çò d’Orange serà fin setembre de 2026.

SFR e Bouygues Télécom coparàn la 2G fin 2026.

Per la 3G, Orange desbrancarà los equipaments fin 2028, SFR farà pariu e Bouygues o farà un an mai tard.

Lo gròs del problèma d’aquesta arrèst ven de l’industria: los ascensors e d’autras maquinas connectadas coma de distribuidors, terminals de pagamant e veituras connectadas èran o son encara venduts amb una sola connectivitat 2G. Aquò significa un remplaçament de materials qu’auriá èsser anticipat estant que las datas de fin de la 2G son conegudas dempuèi una decennia. Ven amb un còst.

Un conselhi abans de terminar aqueste article.

Vos aconselhi d’anar als paramètres de vòstre mobile per activar las sonadas Wi-Fi. Aquò fa que quand lo mobile es connectat en Wi-Fi, utilizarà aquesta connexion per las sonadas e SMS. Aquesta foncionalitat es plan utila a l’interiora ont la cobertura mobila es sovent mai febla. Se la recepcion es gaireben inexistenta, podètz quitament passar en mòde avion puèi reactivar lo Wi-Fi per aprofiechar de las sonadas Wi-Fi; aquò sollicitarà mens la batariá, que’l mobile sens ret manja lèu la carga.