Opinion
2025 farà tantarra...
L’annada que punta va conéisser d’eveniments màgers que pòdon cabussar d’un caire coma de l’autre. 2025 farà tantarra...
Que ne virarà de las guèrras? Lo 20 de genièr, lo Donald Trump serà President dels Estats Units. Es que lo conflicte Ucraïna-Russia s’acabarà en 24 oras coma o afortís dempuèi de meses? Cossí? A quin prètz? Que pesarà dins la pacha Putin-Trump la votz de Zelenski e aquela d’Euròpa?
Es que los poders israelians e palestinians s’acordaràn per que lor poble posquèsson viure en patz? Es que 2025 veirà aquel chaple d’innocents, d’un costat coma de l’autre, s’acabar o se persègre? Es que un jorn, per astre, parlarem pas pus d’aquel conflicte?
Es que lo poder novèl a Damasc voldrà o podrà, dins l’annada venenta, servar la libertat de viure e de dire dels Sunnitas, Alaoitas, Curdas, Crestians, Druses,... Aprèp mai de cinquanta ans d’una dictatura inumana, ferotja; es que Siria s’encaminarà enfin dau la libertat, la patz e la convivéncia?
Es qu’Euròpa parlarà d’una fòrta sola votz per pesar sus l’avenidor d’Ucraïna? Es que las eleccions federalas butaràn Alemanha a se requinquilhar? Es que França cap quilharà de l’embolh que la rosega? Es que trobarà los mejans politics, economics, socials per tornar prener vam?
Es que los umans trabalharàn a anequelir un pauc mai la planeta o es qu’ensajaràn de la trebolar belcòp mens? Es que lo sens bon subrepassarà lo necitge? Es que la rason plaçà prendrà a la desbaruta? Es que l’èsser uman paisselarà l’I.A. (intelligéncia artificala) o es que l’I.A. paisselarà l’èsser uman?
Just aquí quauquas demandas, n’i a ben segur un molonàs d’autras... 2025 nos balharà, benlèu, quauquas responsas. O nos dirà l’avenidor.
Dins tot aquel revolum, sèm segurs d’un causa: 2025 aurà ben 365 jorns!
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Lo nòu partatge dau monde es deja fach. I aura un blog de las Americas, un bloc african, un bloc Russia/Euròpe, un bloc asiatica, un bloc Oceania. Quò sera daus blocs economics en prumier mas en economia lo partage dau monde s'es totjorn fach. Quò era entre Espanha e Portugal, entre France e Angleterra, entre Russia e Estats-Unis.
Dins tots los cas, los pais tradicionaus peseran pas lords. I a pas una guerra entre Ukraina e Russia mas una una guerra entre Estats-Unis/Euròpe contre Russia tot aquò au servici de las multinacionalas las pus cheitivas. Las institucions internacionalas (ONU, OMS, e autres )seran suprimadas e remplaçadas per autra causa.
França devra far emben la revòlta de sas anciennas provinças; Paris perdra son aura e son gost dau centralisme.
Fau comprener que lo cambiament es aqui mas coma tot cambiament i aura de las incertitudas, daus brejadis.
Per Occitania e lo noveu monde chau misar sur una societat, d'amor, de solidaritat, de patz L'òm pòd pas separar la cultura de l'economia. Religion e laicitat aura pus d'aura.
Chau se drubir a las novelas mentalitats que van eclore. Oc-es i a una autorota per la revendiccion occitanista.
Quò es pas Trump e Potin que fera aquò mesme en favorisar aquelas ideias. Lo cambiament es dins lo còr de las gens, dins lòr volontat de bastir una societat de patz e de solidaritat.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari