Totas las certitudas suls foncionaments democratics ne prenon un còp amb l’anar de las causas e unes Estats-Units que vòlon plegar la planeta a lor vejaire.

Paura França representada a l’investitura del president Trompeta per Zemmour e sa deputada europèa. Annadas e annadas, USA mestregèron lo monde en sostenent las dictaturas d’America centrala e del sud, organizacions sendicalas o politicas europèas, sens parlar de guèrras en Indochina… Ara, montan d’un gra: lo Trompeta clarona que vòl restacar Canadà als USA, anar conquistar Groènland e se tornar emparar del canal de Panamà, lo Mexic i perdriá lo nom de son gòlfe…

Pel trompetaire, l’auséncia d’aiga a Los Angeles ven pas de son utilizacion per l’agricultura intensiva, mas per çò que d’unes ecologistas voldrián salvar un peissonet que, per el, evidentament, servís de res!

Vertat qu’amb son concèpte de vertat alternativa despassa los pichons que juran los grands dieus al paire e a la maire que li dison la vertat vertadièra. D’aquesta marrida passa, mai la messorga es gròssa, mai pren d’ample.

E de mai, lo president ten ara una ajuda de tria amb l’òme lo mai ric del monde e sos collègas dels rasals de mai en mai a-socials. Vestisson del nom de libertat d’expression la difusion massissa d’informacions falsas e falsièras e la manipulacion de las opinions. Lo Musk ven cap de fila. Aviá ja mostrat son costat uman en batejant son filh X Æ A-12, e sa dròlla: Exa Dark Sideræ. E francament, se vòl partir a la conquista de Mars, li demòra una mesada per anar faire Carnaval e comptar messorgas als marcians a l’ora del jutjament del Bon-Òme!

E totas aquelas informacions e manipulacions clinan d’un sol costat: l’extrèma-dreita amb sostens afirmats en Alemanha, en Anglatèrra… Rajustatz las mimicas de faire amic-amic amb lo Potina e poirà téner un ròtle de Raspotina sens cap de problèma!

Per eles, Euròpa es l’enemiga que vòl faire de règlamentacion (levat quand se ditz Meloni o Orban). Solament, òm se demanda se cal utilizar lo present dins aquela formulacion. Dempuèi lo fòrabandiment del commissari francés Thierry Breton que presicava per unes contraròtles de las besonhas informatizadas, es puslèu l’operacion «pòrtas dobèrtas» que se debana: las possibilitats d’aver una(s) usina(s) Teslà val plan lo còp de tampar los uèlhs sus las farlabicas dels miliardaris e dels imperialistas americans.

Aquò gita una pèira bèla (que se ne trufaràn coma d’una figa seca) los e las que presican lo desvolopament exponencial d’una Intelligéncia Artificiala als algoritmes tenguts per aquela tropalha de malfatans qu’an per idèia de tornar al temps dels esclaus, plegadisses a lor mal-voler. Non, francament e occitanicament, beurai pas d’aquel Musk’adet!

Pas question de chaptalizar!

Cabuçarem pas dins l’inconegut amb X! Una resisténcia se met en plaça amb los desabonaments a X o las interdiccions aicí o ailà… Es pas question de chaptalizar e de rajustar de sucre al Musk’adet! Aquò li cambiarà pas lo gost, d’autant mai que lo Zuckerberg es de la meteissa farina: visca lo masclisme; non a las politicas d’inclusion; non a la diversitat!

E a l’encòp, cal pas tombar e trabucar dins l’autre travèrs: tic-toquejar e chumar un alcòl de ris que nos farà pas faire riseta (o benlèu, provocarà un rire jaune)!

Qualquas cantinas de muscadet?

Per negar nòstre chagrin fàcia al desanar de la planeta, benlèu que nos caldrà plan beure qualquas cantinas de muscadet (s’es pas tròp car de pagar lo transpòrt dempuèi los luòcs de produccion en Laponia en rason del rescalfament climatic decabestrat!).

Aquel vin blanc sèc de la contrada de Naoned nos serà encara possible de l’acompanhar de quauquas ustras de Leucata? Per l’ora, unas vinhas de muscadet s’espandisson encara sus la comuna de Clisson, termièra del país breton, mas sabi pas se una blanca eimina corrís totjorn entre las socas…:

La voilà la Blanche Hermine, vive la mouette et l’ajonc!

La voilà la Blanche Hermine, vive Fougères et Clisson!

Provèrbi: Nos agrada mai d’èsser rics de còr que rics de moneda.

Muscat-de-Sant-Joan Roch