La distribucion Linux derivada d’Ubuntu passa a la version 22.1, nom de còdi Xia. Aquesta nòva version apòrta de melhoraments e correccions d’anomalias. L’environament de burèu per defaut Cinnamon arriba en version 6.4. La novetat màger es lo mòde nuèch que permet de redusir lo lum blau de l’ecran per evitar los problèmas ligats a aqueste tipe de lum. Un nòu tèma es disponibla e d’activar manualament; es mai fosc e los elements son mai redonds. Las bóstias de dialòg son retrabalhadas e las notificacions melhoradas. Los paramètres de subreamplificacion del son se tròban simplificats.

Demest los quicomets qu’agradan i a lo renomenatge en massa amb opcion per tirar los diacritics, la compatibilitat amb las miniaturas OpenRaster, mai d’opcions d’alimentacion.

I a d’autres cambiaments dins lo motor que los utilizaires veiràn pas forçadament:

la còla de Team decidiguèt d’amassar e de modernizar los diferents espleches APT. APT es ligat a la gestion dels paquets DEB tipics de la platafòrma Debian. Las modificacions se tròban dins los elements apelats Aptkit e Captain. Los autors dònan los avantatges e començan per «traduccions melhoradas». Ara que recampèron tot en dos elements, las traduccions son mens d’en pertot e se pòdon actualizar. Abans, los diferents elements èran pas totes mantenguts e doncas las nòvas contribucions en traduccions arribavan pas totjorn a l’utilizaire final. Son complètament traduches en occitan,

Aquesta version serà mantenguda fins a 2029, e poiretz contunhar las mesas a jorn per anar mai luènh.

Linux Mint es coma un soc e las fuèlhas e brancas serián los environaments de burèu. Per defaut Linux Mint prepausa Cinnamon, perque la còla n’es a l’origina, mas podètz tanben utilizar Linux Mint amb MATE e XFCE. Per çò qu’es de la traduccion: MATE es l’environament de burèu mai complèt puèi XFCE e finalament Cinnamon. MATE es gaireben tot traduch. Se poiriá acabar Cinnamon pro rapidament se èrem un gropeton de 3 personas. Se vos interèssa, contactatz-me.

Lèu vos farai un tutorial per aprendre a ensajar e installar Linux Mint, mas ensajarai que siá generic per poder installar una autra distribucion coma Ubuntu.

Auretz pas mai d’excusa per utilizar pas un ordenador en lenga nòstra.