Quin rapòrt pòt existir entre Bruce Springsteen e Tolosa? A çò que sembla pas nat, sustot que l’artista american a pas jamès hèit un concèrt dens la vila ròsa. Mes, se cavam un drin, vam trobar una vidèo sus YouTube on The Boss canta una cançon traditionala de 1867 aperada (The Daring Young) Man on the Flying Trapeze.

Mes qui es aqueste audaciós joenot sus un trapèzi volant?

La cançon est dedicada a Jules Léotard, nascut en 1838 e mòrt en 1870 a Tolosa. En mès d’aver creat un gimnasi dens sa vila, cofondat lo Veloce Club Tolosan e participat (e ganhat) a las corsas de bicicleta Tolosa-Vilafranca de Lauragués e Tolosa-Caraman (on Clément Ader, son amic, experimentèc bendas de cauchó a l’entorn de las ròdas e acabèc tresau), estoc famós a son epòca per aver inventat ren de mès que lo trapèzi volant.

Es lo purmèr deu monde d’aver realizat un saut perilhós en hautor entre dus trapèzis.

Es dambe aqueste espectacle navèth que’s produsiscoc un pauc de pertot peu monde e vasoc fòrça popular au nivèu internacionau.

Mes hascoc tanben parlar d’eth pr’amor de sa tenguda. Refusèc de s’apelhar classicament coma los autes artistas de circ e imaginèc un justacòrs que botava mès en valor sa musculatura, çò qu’avoc com efèit de hèr vénguer fòrça daunas e segur tanben uns sénhers, sedusits per la nautat de la proessa e, a l’encòp, per l’aspècte sedusent de l’estela internacionala.

Aquò que’u causèc un procès deu director deu Circ de l’Emperaira que l’emplegava e l’interdiccion per la prefectura de polícia de sas fòtos hèitas per Paul-Emile Pesme, sus las qualas estoc jutjat tròp denudat.

Lo cinèma american estoc tanben inspirat per eth dambe un filme de 1935 que s’apèra Man on the Flying Trapeze de Clyde Bruckman e W.C. Fields.

Après totas aquestas invencions e viradas internacionalas, se moriscoc a Tolosa a l’edat de … 32 ans.

E se cercatz com se ditz “justacòrs” peus esportius e artistas en anglés, catalan, alemand, castelhan, chinés (連體衣), arab (ليوتارد), japonés (レオタード), corean (레오타드), malés, suedés e turc, trobaratz una responsa estonanta: se ditz “leotard”, solide!