Vos vòli presentar doas portadas d’entrada per trapar d’aplicacions liuras en linha.

Sovent las distribucions Linux prepausan de logitècas, centres d’aplicacions etc. Mas podètz tanben installar çò que volètz sus vòstre ordenador, que siá o pas dins la lista d’aplicacions referenciadas pels manteneires.

Aplicacions per GNOME

Lo site aplicacions per GNOME presenta mantun logicial desvelopat pel monde de GNOME o de simpatizants. Aquestes programas son generalament concebuts sul modèl: un prètzfach = un programa. Aquò fa que las aplicacions presentadas son iper especializadas per un domeni.

La majoritat de las aplicacions son traduchas en occitan. Trobaretz lo nom del logicial e una fraseta de descripcion puèi en clicant una descripcion mai complèta e d’autres detalhs.

Se lo site passa pas solet en occitan, verificatz vòstre paramètre de navigador.

FlatHub

FlatHub.org, que se bota pas solet en occitan, es lo portal d’aplicacions del format de logicial empaquetat Flatpak. Es un biais de distribuir de logicials de manièra isolada de la rèsta del sistèma, aquò permet mai de seguretat en executant los programas dins de contenedors.

Lo portal es pas complètament traduch en occitan. Traparetz de categoria e una barra de recèrca per accedir a una lista de logicials. Notatz que las aplicacions GNOME son generalament disponiblas al format Flatpak amai del format tipic de las distribucions (.deb etc).

Snapcraft

Un darrièr portal, Snapcraft, es lo catalòg d’aplicacions del format creat pel monde d’Ubuntu. Coma lo Flatpak es un format isolat. Las paginas son totas en anglés e lo contengut mendre comparat a FlatHub.