• Atge: LeBron James jòga en NBA a 40 ans. Miss France d’ongan ten 34 ans. L’atge fa pas res a l’afar, mas contunham de plaidejar per la retirada a 60 ans.

• Aucèls: Fa tres sègles que se n’èra pas vist dins la contrada. Tres ibis cap-pelats apercebuts en Catalonha-nòrd. Benlèu qu’an tròp tardat per anar véser lo perruquièr! Bona novèla o marca suplementària del rescalfament climatic?

• Avançada: Coma per una veitura, va èsser complicat pels Estats-Units d’anar de l’abans sens C/cartèr, en aquestes temps de trompariá e d’enganas.

• Boscatièrs: A París, agents de la vila tronçonan d’arbres novèlament plantats pensant qu’èran arbres mòrts.

• BU: Bestiesa Umana fàcia a Intelligéncia Artificiala, la batèsta va èsser tarribla. Le sciéncia-ficcion en passa de l’emportar sus las realitats prigondas de la vida vidanta?

• Burèu: Coma afogat de rugbí, m’es malaisit de creire qu’a Oachington lo burèu del Mèstre del Monde es… oval!

• Calendièr: Aqueste 29 de genièr marcava la debuta de l’an novèl chinés: l’an de la sèrp de fusta. Sabi pas s’es una sèrp que viu dins los arbres o pels bòsques o se se parla del cusson!

• Campairòls: Los franceses manjan 116 tonas de morilhas (bonets de capelan) per an e ne produsisson 8 tonas! Se vos arregalatz de la consomacion benfasenta de glifosata, fasètz-vos una meleta a las morilhas de China, de Turquia o de Paquistan…

• Capitala culturala europèa: Montpelhièr serà pas capitala culturala europèa en 2028: Bourges es estat retenguda. Ongan, las 3 capitalas son Chemnitz dins l’èst d’Alemanha, Gorizia e Nova Gorica de part e d’autra de la frontièra italo-eslovèna. Mas qu’aquò empache pas lo Clapàs de culturalizar sens daissar de caire la cultura occitana...

• Campions de tardor: L’Estadi tolzan a XV e Carcassona a XIII son campions de tardor. De confirmar en fin de sason. Pel fòbal, es tornarmai la passejada tristoneta del PSG. Seriá ora tanben que lo Barça se revelhèsse (e vos parli pas de l’OM!)!

• Democracia: De qué pensar d’un país ont lo novèl president, tot just investit, signa un fais de decrets en se trufant de las leis, de las amassadas, dels Estats locals, dels pactes internacionals, de l’ecologia, de l’istòria (e ne passi)…? Apelatz aquò: democracia?

• Gos robotic: La cooperativa Maïsadour envisatja de fornir a sos aderents un gos-robòt per dintrar las galinas lo ser. Gardarà lo crit vièlh de las boratièras per faire dintrar la polalha a la galinièra? La semblança de la ferralha amb un gos vertadièr es plan lonhdana! Demòra d’esperar que los polets e las galinas siaguen pas piòts o piòtas...

• Governament francés: Daissatz anar: es just lo temps d’una valsa!

• Tamarau: Cal pas confondre lo tamarau e lo tamaron. Lo tamarau es un bufle que viu dins las illas Filipinas. Aquò empacha pas una Filipina d’èsser partida a la caça del tamaron dins una nuèit lengadociana!

• Telefonadas: Quand capitan pas de dormir la nuèit, lo «filosòf» BHL e lo president se telefonan… Se compren aisidament qu’apuèi li es complicat de prene bonas decisions dins la jornada…

• Torisme envasidor: Una fòrma de luta dels galicians contra lo tot-torisme: traversar de longa los passatges per pietons per crear unes taps mostruoses de circulacion automobila.

• Vinhas: Lo còr me dòl de veire las vinhas arrancadas, los montairons de soquets que se sap pas solament se faràn cuèire un talhon de carn, cremar un Bonòme de Carnaval o faire sautar lo fuòc de la Sant-Joan… Lo monde vòlon pas mai beure de vin… Qu’i podèm faire? Levat de se sovenir e de plorar la fin d’un monde e d’una civilizacion. Anem, fai-me passar la cantina de Menerbés, de Corbièras, de Fitor, de Cabardés, de Malapèira, de Juranson, de Sautèrnas, de Marcilhac, de Sanch Inhan, de Bandòl, … (ad libitum) … A la teuna: santat!

  • As vist: sèm ja a la fin de genièr!

  • Macarèl, ai encara mancat lo Dry January!

• Vòts: La Casa de la Generalitat a Perpinyà doblida, dins un primièr temps, de mandar los vòts en catalan! Vertat que fa temps que Rosselhon es restacat a França!

• Zorrò: L’eròi de nòstra enfància se fa vièlh e s’es emborgesit. Lo sergent Garcià a magrit. E nosaus tanben, nos fasèm vièlhs!

Èfa-ge-pigassa Roch