Benlèu que vos arriba de voler transferir de fichièrs de vòstre mobil cap a l’ordenador o l’invèrs. Vos mandatz un corrièl o alara brancatz un cable USB per realizar lo transferiment. I a d’autras solucions sens fil per escambiar de fichièrs entre periferics connectats a un meteis ret Wi-Fi o pas.

LocalSend

LocalSend es un ensem d’aplicacions e logicials per enviar e recebre de fichièrs e dossièrs mas tanben lo contengut del copiar-pegar. La solucion es disponibla per Windows, macOS, Linux e costat mobil per Android e iOS. Valent a dire que i a plan de probabilitat que poscatz l’utilizar!

Lo site web de LocalSend vos guidarà per l’installacion: https://localsend.org/oc

Los transferiments son securizats e quitan pas lo ret Wi-Fi emplegat. Podètz tanben montar un ponch d’accès Wi-Fi per connectar dos aparelhs mobils.

Soi a traduire l’ aplicacion , mas me manca lo temps d’aquesta passa.

Warpinator

L’equipa de desvelopament de Linux Mint prepausa un programa per escambiar de fichièrs entre ordenadors jos Linux sul meteis ret, que siá Wi-Fi, ethernet o los dos. Lo logicial es complètament traduch en occitan. Vos daissi una pagina de wiki que dòna d’explicacions e de ligams per ne saber mai: https://doc.ubuntu-fr.org/warpinator

Realizatz l’installacion amb de fonts oficialas, via una botiga d’aplicacions o un gestionari de paquets.

Warp

Warp permet d’enviar e recebre de fichièrs sul ret local mas tanben sus Internet en utilizant lo protocòl Magic Wormhole . Coma Warpinator, poiretz transferir de fichièrs d’un ordenador Linux a un autre mas gràcia al protocòl Magic Wormhole podètz comunicar amb d’autres aparelhs coma un ordenador Windows o un mobil amb Android.

L’utilizacion es simpla: dobrissètz l’aplicacion e depausatz lo fichièr d’enviar, sus l’autre periferic copiatz lo còdi o numerizatz lo còdi QR afichat e lo transferiment se lançarà. Lo jaç de chiframent es construch amb PAKE.

Warp es complètament traduch en occitan.

Mai d’informacions: https://apps.gnome.org/oc/Warp/