Vos tòrni dire «Adieu siatz, brave monde e tan pis se me trompi!» Es aital que saludava un tal del temps del rei Cezet —una epòca quand las femnas, joves o vièlhas, anavan pas al cafè— quand dintrava dins un cafè per beure un còp… e lo brave monde e los autres, totes èran contents. Anuèit, los progressistas parlarián de convivialitat!

Vos daissèri a l’Epifania e vos tòrni trobar per Sant Valentin; e podètz causir lo sant que vos agrada per çò que n’i auriá agut al mens uèit Sant Valentin. Mas los libres dison que lo dels amoroses seriá Valentin de Terni qu’auriá viscut al sègle IIIⁿ.

Pendent tot aquel temps —al mens las primièras tres setmanas— daissèri la Facultat s’ocupar de ieu; las maissantas lengas diràn que pigritgèri o se volètz faguèri lo fug-l’òbra. La canha es un drech mas unicament quand es consentida e pas forçada!

Puèi, èri malaürós de constatar que lo monde virava sens ieu e èri segur que los que seguisson mos conselhs e subretot ne tenon compte anavan far de conariá.

Aquò manquèt pas! Nòstre president, li demòra pas qu’a far de discorses e lo planhi perqué se voliá jupiterian e mèstre dels relòtges e se deu contentar de jogar lo ròtle d’un president de la IV^a Republica. Nòstres deputats, las mocions de censura que fan tombar los govèrn, aquò los amusa pas pus e lo Bearnés pòt polsa un chic.

Avètz notat lo chafre balhat de tira per la premsa de Lutècia: lo Bearnés, coma fa a cada còp qu’un òme dins un posicion importanta es pas un Parisenc de soca o assimilat…

Coma totjorn, França se resumís a Lutècia e la resta del país es un pargue pels lésers de la fina equipa que se crèba a far marchar lo «país de las tres cents varietats de fromatges».

Empacha pas que totes aquestes arlèris contunhan d’emplegar un vocabulari de grrandor quand parlan de França: grand país, poténcia granda, etc. Ai coma l’mpressionque lo mot: «poténcia mejana» espauruga lo microcòsme politica autan de dredha coma d’esquèrra.

Que França siá dins la panada inquieta pas tròp los dirigents europèus dins la mesura que l’Union Europèa fa pas la corsa a la primièra plaça… Çò mai inquietant es la situacion dels Estatsunidencs que venon de pòrtar un cabord a la presidéncia… Lo còp d’estat qu’a pas capitat de far quand refusava d’acceptar l’eleccion de Biden lo va poder realizar amb l’ajuda dels plotocratas qu’an sentit lèu-lèu la direccion del vent e vist lèu-lèu tanben que partajavan las meteissas valors: Dolars en primièr, dolars en segond e per acabar dolars encara!

Plotocratas e sacamands van trabalhar man dins la man per desmarmalhar logovèrn federal e permetre als estats de far çò que vòlon.

Lo n° 47 a quatre ans per installar, amb l’ajuda de cort suprèma, un novèla constitucion que balhariá als republicans la possibilitat de gardar lo poder. Personalament, seriái pas susprés se tornava suprmir la règla implicita qu’interdís a un president de far tres mandaturas.

Èn defòra, farà tot per vassalizar los païses mai fèbles.

Fins ara, sols los estats europèus qu’an conegut los benfaches del comunisme sovietic e veson de prèp lo comportament del psicopata de Mòscou an lançat un programa de defensa per melhor se defendre ara que Russia e Estats Units an cadun un cabord coma president. La classa politica del païses importants (membres fondators) retnan de despensar moneda per armaments per contrariar pas los electors.

Las annadas a venir daissan preveire un periòde dangeirós, long e dificil

Mas aurem l’escasença de ne tornar parlar…