Aimariái de poder començar mas divagacions per «Ieu sabi un conte!»; aquò nos cambiariá las idèas mas o pòdi pas amb totes aquestes arlèris, tant jornalistas coma politicians, que marchan sul cap e vòlon que lo monde los seguiscan!

O alavetz, me calriá —mas soi tròp pigre— dreiçar una lista de cada bestiesa o enormitat dicha pels un e pels autres. Lo problèma es que los mèdia parlan sonque dels pauvals e crapulas e qu’aquestes son generalament presidents d’un país grand o pichon… Tot aquò mes fatiga!

Soi injuste quand critiqui los jornalistas e los mèdia en genreral ça que la; lor cal far amb las despachas qu’arriban e tant al defòra coma al dedins de la França metropoltana, una cata i poiriá pas trobar sos catons. Mas enfin, un jornalista es pas pagat en principi per servir las sopas çò qu’en cò nòstre fan tròp sovent de mon ponch de vista.

S’escotatz un pauc los mèdia estrangèrs seretz estonats de veire de jornalistas téner pè malgrat las menaças que recebon de la part de las mafias que segondon lo n°47.

Lo n°47 estatsunidenc amb son equipa de sacamands, de messorguièrs, adèptes dempuèi un bèl brieu de veritat alternativas e de novèlas falsas son de professionals que tenon los mèdia en alèrta. Totes, ràdios e canals de television, relaiats par las rets socialas sont aquí a espinchar lo mendre signe dels dets o de las parpèlas per o far saber al monde entièr quand sabon —o deurián saber— que 99% de çò que dison aquestes dictators o aprendisses dictators nos menariá a las galèras en cò nòste e encara mai viste en los Estats Units.

Lo que mena lo bal es lo n°47 estatsunidenc que comola amb sos adèptes totes los adjectius que fan flòri d’ordinari dens las dictaturas. Adara que la Cort suprèma li a acordat l’immunitat, se daissa anar e encoratja los òmes e las femnas qu’a nomenat com ambaissadors o directors de quicòm a agir tot parièr.

A tot senhor, tot onor. Cal aver de fetge per acusar lo president d’Ucraïna de dictator e dire qu’es el qu’a declarat la guèrra a Russia. Lo vice president es pas en resta quand excusa implicitament los massacres en Ucraïna mas acusa los païses europèus de repectar pas la libertat d’expression, etc.

Legissi las tribulacions de nòstres sacamands sus CNN que contunha de mençonar messorgas e veritats alternativas demest las qualas tretze d’importància dempuèi qu’es en foncion. Lo petit libre roge serà pas qu’un libròt comparat a la Bíblia del numero 47 quand serà ensenhada dins las escòlas…

Gaireben cada jorn, legissi de corrièls d’amics estatsunidencs que van dever suportar aquel psicopata e son equipa de politicians autan corromputs coma el. Totes an pas la possibilitar de s’exiliar en Espanha o en Itàlia!

Mas basta! Los diferents regimes viran a drecha un pauc pertot e pas unicament en Euròpa. Es mai aisit ara qu’an un modèle de seguir…

Quitament, en cò nòstre ont avèm talament de politicians de valor que nos podèm pagar lo luxe d’aver un primièr Ministre e un govèrn novel cada mes o quasi! E i a de candidats que se preissan a la pòrta…

Lo parelh germanofrancés, tan sovent lausat per menar Euròpa es a la deriva mas es pas de drecha, pensatz! Ongria es un pauc mai illiberala que frança, etc. La drecha extrèma, coneisson pas!

Un sol país, pel moment, a pres las menaças del n°47 e del tsar de Moscòu al seriós es Polonha, seguits pels Estats baltics qu’an pas doblidat encara lor istòria e las relacions amb l’ògre sovietic autres còps, rus adara.

Malgrat los avertiments, las poténcias europèas an volgut gardar cadun sa esobeiranetat en se satisfasent de leis sus la grossor de las bananas o la velocitat suls periferic de las vilassas… Mas per las taxas cadun es mestre en cò son; la defensa comuna, n’i a pas besonh pr’amor nòstres païses fan de comèrci e pas la guèrra… Doblidat l’adagi Si vis pacen, para bellum! E subretot; lo cosin d’America (estdatsunidenc) nos daissarà pss tombar se per cas… An doblidat la possibilitat d’un cabord egocentic…

Las guèrras son coma los atemptats, lo monde si acostuman e quand lo alta- al-fuòc o la patz es tornada, i a de trabalh per los subrevivents e l’eficacitat de las armas son estadas verificadas in situ e non pas en laboratòri…

La tresena guèrra mondiala, que dison ibrida, a començat, çò dison d’unes cercaires e observators…

Pensatz que nos portariá tòrt se prestavèm un pauc mai l’aurelha?