Amb los jorns que passan, l’actualitat que corrís, l’imaginacion que fa son camin,… unas idèias venon per redigir aquesta cronica. Aquelas nòtas, d’unas trapan pas collègas per ne faire una tematica, d’autras arriban tròp tard en ajust de causas ja ditas. A un moment, demòra al cronicaire la solucion de faire una cronica dels elements qu’an pas fait cronica (Me seguissètz?). Es aqueste còp qu’avètz atal dreit a una cabussada dins lo forbic.

• Arrèst de l’A69: Se pòt pas imaginar la fòrça e lo poder dels esquiròls, mas mèfi a las entorlopas a venir dels predators.

• Balena: Un caiaquista chilen es engolit per una balena e es escupit lèu-fait per la bestiassa. Una experiéncia biblica coma la del Jonàs! Sol un nanet pichonetàs poiriá èsser engolit per l’animal se fasiá mens de 38 centimètres! Mistèris de la Natura!

• Carnaval: Lo cònsol d’Obernai interditz l’utilizacion de confettis per Carnaval, al nom de l’ecologia e de la penibilitat del trabalh pels engranaires. Demanda de los remplaçar per baudufas de savon!

• Castelhan: 43 milions d’americans dels Estats-Units emplegan lo castelhan. Coma per son primièr mandat, lo president Trompeta a fait barrar la version espanhòla del site internet de l’Ostal-Blanc! Dins un segond temps, signa un decrèt que fa de l’anglés la sola lenga oficiala del país!

• Catalan: Lo cònsol de Perpinhan interditz los maridatges en catalan. Explica: «Un elegit o un foncionari municipal an de parlar francés».

• ChatGPT: Un gat a petat e una flaira pudesina bruna s’espandís sus la planeta.

• Eslogan: Manifestacion dels gardians de preson FO a Carcassona. Sus la pòrta de l’establiment penitenciari, an desplegat la bandeiròla: «FO, la force de la liberté». La libertat, de qual? Dels presonièrs?

• Fai ta mala!: Vista l’evolucion politica dels Estats-Units, l’estatua de la Libertat envisatja de migrar. Mas qun país li poirà èsser un refugi?

• Galeta-salsissa: 100 mètres de galeta e 500 salsissas: un recòrd del monde breton batut lo 2 de març.

• IA: Se trapa mai d’intelligéncia dins lo cap de l’ase que brama I! An! I! An! que dins l’IA.

• Intelligéncia superiora (remember Padena): Avètz notat que i a pas de titolet sus las casquetas Make America Great Again!

• Libertat d’expression: Los mots son de trapanèlas. Per d’unes, libertat d’expression significa difusion d’informacions falsas e manipulacions.

• Policièrs: Se la lectura de romans policièrs vos agrada, vos cal pas mancar de legir los libres del Joan Ganhaire Meschant temps Maraval! e del Jòrdi Peladan Bruga, feuse e genèsta recentament pareguts dins la colleccion Atots de l’IEO.

• Ruscada: La Catarina de jol pont de Mirabèl a de lagui de se faire per son trabalh de bugadièra ara que l’Usain Bòlt fa la ruscada mai lèu que son ombra amb un lessiu capable d’enlevar las bonhetas invesiblas. Benlèu pels vestits de las trèvas?

• Silenci: Lo grand concèrt de las Regions de França-3 èra consacrat al Sud (redusit a las regions Occitania e Provença) aqueste 28 de febrièr. Se Chico e los Gipsies i anèron d’una cançon gitana e Patric Fiori de l’interpretacion de Corsica, es de creire que dins aquelas contradas se trapen cap de cantaires occitans e catalans…

• Submersion: D’utilizar lo mot Submersion, lo prince de Pau neguèt, amb una pèira al còl, sos projèctes.

• Television: Nadau a C-News, lo 27 de febrièr. Reçaupre un cantaire occitan e prononciar mots occitans aquò fa rire lo Pascal Praud e sos collègas contents de reçaupre un salvatge del Sud. Total tristum! Qunes jornalistas: 50 ans sens s’avisar de l’existéncia de Nadau e de la cançon occitana!

• Teslà: La granda tela dels sòmis de poissença s’esbrigalharà en milierats de tèsses e Teslà serà pas mai aquí.

• Tigres: En India, la populacion de tigres a doblat en dotze annadas.

• Trompeta e lo Groenland: D’en primièr, creseguèri qu’èra un episòdi novèl de Groland sus Canal+.

Formic Roch