Dempuèi la debuta de l’annada, un movement es a créisser al dintre de l’Institut d’Estudis Occitans. Entitolat «Obrar Amassa», reprenent la devisa de l’associacion «la fe sens òbra, mòrta es», vòl prepausar un vam novèl a l’IEO.

Aquel collectiu a publicat un manifèst jos la forma d’una peticion qu’a reculhit mai de 200 signaturas de sosten.

Prepausarà de candidats a l’eleccion del conselh d’administracion a l’escasença de l’assemblada generala de l’IEO los 9, 10 e 11 de mai. Aquela lista de candidats es dobèrta a d’autras candidaturas; podètz contactar la còla alternativaieofederal@gmail.com.

Lo movement es nascut de la manca d’accion e de visibilitat de l’IEO federal, e de tensions entre l’IEO e las associacions federadas. Prepausa un camin novèl en tornant partir dels objectius de l’associacion per pensar d’accions e de foncionaments que correspondan a las espèras dels aderents.

Vòl bastir un IEO federal mai vesedor, mai actiu al nivèl nacional e internacional, per portar las demandas legitimas per nòstra lenga en perilh. Un IEO que seriá fòrça de proposicion, en ligam amb las autras estructuras occitanas e las autras lengas. Tanben vòl sosténer tot çò que se fa per e amb l’occitan: las creacions, los projèctes e las experimentacions nombrosas que florisson pertot. Vòl far lum sus la vida e la riquesa de çò nòstre, del malhum associatiu remirable que representa los IEO e suls actors de l’occitanisme.

«Obrar Amassa» es sostengut per de militants ancians, coma Eric Fraj, Josiana Daunís-Martí, Didier Mir, Jan-Marí Caunet o Joan-Pèire Cavalièr, mas tanben per de militants e d’actors mai joves de la cultura occitana: Joan-Carles Codèrc, Clémentine Bancarel, Rodín Kaufmann, Maëlle Dupon.

Aquel movement, ancorat a l’encòp dins l’istòria de l’occitanisme e dins la vida, las experimentacions actualas dels occitans e occitanas, es un signe fòrça positiu per las lenga e cultura nòstras e per l’Institut d’Estudis Occitans que festeja ongan sos 80 ans.