• Anti-lei: An l’art del costat del Senat de preparar anti-leis, es a dire tèxtes que dison qu’una lei o una decision judiciària a pas de s’aplicar que siague per l’arrèst de l’A-69 o l’escampatge de produits nocius dins la natura,…

• Art de la discutida: Lo Vairon anóncia la tenguda d’una discutida dobèrta sus las retiradas, puèi senhala qu’es pas brica question de ne cambiar la mesura principala.

• Autonomia: Definicion trompetiana cap a Groenland: «Sèm d’acòrdi amb vòstre dreit a l’autodeterminacion. Vos acceptarem quand decidaretz de nos rejónher…»

• Borsa: Tres estudiants galeses an recebut una borsa prestigiosa per los ajudar a contunhar d’estudiar las matematicas a l’universitat pel mejan del galés. Jacob Matthew Redmond de l’Universitat d’Aberystwyth, Iwan Rhys Bryer e Siôn ap Llwyd Dafydd de l’Universitat de Cardiff son los destinataris de la borsa Gareth Pierce d’ongan. Cada borsa val 3000 liuras e es ofèrta als tres estudiants de licència per qu’estudien al mens un tèrç de lor cors de matematicas a travèrs lo galés.

• Calendièr: Carnaval o pas, febrièr serà jamai de trenta.

• Cambiament d’ora: Passar sèt meses amb l’ora d’ivèrn al relòtge de ma veitura que cal per lo mens «Bac + 5 (o 7)» per capitar lo cambiament.

• Censura: La tièra dels libres tirats d’unas bibliotècas escolaras als USA s’alonga, s’alonga, s’estira e s’espandís. Quauques exemples: L’arrapa-còrs (Salinger), Los rasims de la colèra (Steinbeck), De mirgas e d’òmes (P-A. Bertola), Lo melhor dels mondes (Huxley), Farenheit-451 (Bradbury), La crida de la sèlva (Jack London), Per qual tinda lo clas? (Hemingway), Huckleberry Finn (Mark Twain), 1984 (Orwell), Los nauts de Brama-Vent (Emilia Brontè), Volada a l’en-sús d’una nisada de cocuts (Kesey), Bonjorn tristum (Francesa Sagan), Lo malaut imaginari (Molière), Harry Potter (Rowling), Autobiografia(Malcom X), Sebelís mon còr a Wounded Knee (Dee Brown), De sang-freja (Truman Capote), Irange mecanic (Burgess), los policièrs de Stephen King …! Atal, son per milierats los libres tirats de las bibliotècas, en particular dins las escòlas publicas…

• CIRDÒC: 50 ans per mila ans de literatura… Bon anniversari!

• Consomar francés: Chirac presava la cervesa mexicana, Corona; Bayrou diguèt al Salon de l’Agricultura que sas preferéncias anavan a las cervesas de Belgica… Dins Aude, nosaus, beurem occitan las cervesas de Ciutat, Dòna Carcàs, la Mandra o de las Bruèissas!

• Escrivana: Cada matin, la Margarida Iorcenar asagava los espinarcs.

• Flòra: De rajustar dins vòstra bibliotèca occitana o d’aver de longa jos la man o dins la saca per vòstras passejadas pels bòsques e pel campèstre, lo libre novèl de la Josiana Ubaud: Flòra illustrada-de la mar al mont, paregut cò de Letras d’Òc.

• Intelligéncia bèstia: L’IA es talament intelligenta que sortiguèt a LFI una aficha consacrada a l’Hannouna que repreniá lo biais dels dessenhs antisemitas d’unes temps negres. An pas de creators-dessenhators aluserpits a LFI?

• Migrants: Dins lo Nòrd, una cort d’apèl confirma l’illegalitat d’arrestats prefectorals qu’interdisián a las associacions las distribucions alimentàrias als migrants.

• Omnibús: La Comission europèa propòsa de mesuras Omnibús per amendrir las decisions presas en particular dins los domènis ecologics o climatics per, çò ditz, simplificar la vida dels ciutadans e de las entrepresas: «L’Union europèa a d’afavorir la mesa en plaça d’una environa propicia als afars e velhar a la prosperitat de las entrepresas…» Moneda, moneda,…

• Menut: Un restaurant de Limós que pòrta lo nom d’un dels 50 Estats dels USA anóncia fièrament son especialitat: la fonduda… borguinhona!

• Patz: Definicion potiniana: «Ieu, gardi mon armada; los d’en fàcia, se devon desarmar!»

• Redaccions: L’André Malraux, escrivan reconegut, passava cò de son collèga Michel Debré. Li arribèt d’escriure las redaccions del Jean-Louis Debré. Unes devers que los professors i metèron pas totjorn bonas nòtas…

• Taula de fèsta: Dins un vilatge de Tarn, festejavan la Sant-Patric. Per la taulejada, pas de irish stew (o stobhach gaelach en irlandés), mas de… chocrota (sürkrüt en alsacian) . Lo jorn de la fèsta de la chocrota, faràn un coscós?

• Transpòrts: Una companhia aeriana suspend sos vòls entre Madrid e Barcelona que pòt pas contrar la concurréncia dels trens.

• Viure al País: Avèm unas magrinèlas vint minutas de television occitana per setmana (e encara!). De soetar que siague del tot al tot en occitan e pas amb unes reportatges (coma de còps) sus l’occitan, mas en francés. Se l’entrevistat-da es un malurós o una malastruga que parla pas occitan, se poiriá per lo mens jos-titolar en lenga nòstra!

Diversificat Roch