Coma cada sièis meses la fondacion darrièra l’environament de burèu GNOME publica una nòva version màger. L’an 2025 veirà espelir las version 48 puèi 49 a la fin de l’estiu.

Podèm dire que l’environament de burèu GNOME es complètament traduch, manca vertadièrament pas gaire per arribar als 100% e los tèxtes mai visibles son afichats en occitan.

Interessam-nos als cambiaments e nòva foncionalitats portats.

Benestar numeric

Un novèl panèl fa son apareisson als Paramètres, s’apèla « Benestar » e permet de gerir d’unes reglatges ligats a la santat. A partir d’aqueste espaci poiretz parametrar lo limit de temps d’ecran jornalièr mas tanben visualizar vòstras mejanas d’utilizacion de l’ordenador. Podètz definir las frequéncias dels rapèls per vos anar desgordir las gambas e activar se volètz los avertiments d’agachar al luènh. Autra opcion disponibla, far venir l’ecran gris quand lo limit de temps d’ecran es passat.

Legenda: captura de la version non finala de GNOME 48, ara tot es traduch

Autras novetats

Las notificacions se gropan segon quala aplicacion las emet. Es un compòrtament que coneissètz benlèu amb vòstre telefòn portable.

Un paramètre d’alimentacion energetic permet ara de limitar la carga de las batariás a 80% per las far durar mai longtemps. Aquò se retròba tanben chas’ls telefòns.

Los ecrans e monitors compatibles amb HDR son preses en carga e parametrables.

Lo gestionari de fichièrs Nautilus, apelat Fichièrs en utilizacion reala, carga ara 5 còps mai rapidament los repertòris e genèra 10 còps mai rapidament las vinhetas.

L’aplicacion Loupe que permet de visualizar los fichièrs imatge vos permet ara de realizar d’unas modificacions basicas coma retalhar e pivotar l’imatge.

Quand un casc, un nautparlaire o d’escotadors son brancats, lo sistèma vos prepausa de causir quina sortida àudio utilizar.

Avètz aquí la pagina Web que lista totas las modificacions e novetats, en anglés: https://release.gnome.org/48/

Soi totjorn a cercar de monde per los formar a la traduccion e aital passar la competéncia.

Contactatz-me sus aquò, o s’avètz de remarcas tocant la traduccion.