Los desvolopaires Julian Schmidhuber e Markus Göllnitz prepausan una aplicacion liura que permet de consultar los itineraris en tren. Las donadas venon de provesidors que meton a disposicion de donadas en Open Data. Es lo cas de la SNCF e de mantuna societat de camin de fèr. Es una obligacion legala d’octòbre de 2016 de metre a disposicion las donadas produsidas per las collectivitats localas, las administracions e grandas entrepresas publicas.

En França lo monde anariá sul site ouigo.com, o encara voyage-sncf, segon l’epòca e las estrategias marketing causidas. S’agís pas del site de la quita SNCF mas de sa division agéncia de viatges. Aqueste site, encara que siá recent, es pesuc e mal pensat tròbi. Me cal totjorn dintrar las informacions de viatge dos còps, e sus la primièra pagina lo formulari permet pas de dintrar d’ont volèm partir e ont volèm arribar. Aquò amb las datas, me semblan las entresenhas minimalas... Òm deu suportar un recargament de pagina per arribar a una autra pagina... sonque per conéisser los oraris! Al mitan informatic, se desvelopa aqueste via de far, un formulari en dos còps, per espaurir pas lo monde amb tròp de trabalh mental a fornir...

Mas i a una aplicacion per l’ordenador que permet de se passar d’aqueste site web.

GNOME Railways vos permet d’obténer las informacions de viatge dins un ai!

A man esquèrra donatz las informacions basicas del viatge puèi clicatz «Recercar» e bom, avètz çò que cercatz sens cap de fioritura. L’aplicacion es entièrament traducha en occitan.

Ara, ont crompar lo bilhet?

Amb la dobertura a la concurréncia del tren en França, mai d’una societat pòt vendre de bilhets de tren. Mas sovent lo monde, per costuma, cromparà sos bilhets a la companhiá ligada a l’operator de ret o operator istoric; coma Orange per l’ex France Telecom.

Vos dòni un provesidor alternatiu per crompar vòstres bilhets de tren. Lo site es concebut per èsser leugièr e se cargar rapidament, amb çò essencial. Lo site s’apèla 12train, pensatz a l’Avairon per vos rapelar.

Lo projècte es portat per una sola persona, Jean-Baptiste Marie, que creèt una societat de viatge en linha especializada en venda de bilhets de tren. Trobaretz pas cap de reclama sul site, cap de suggestion per un otèl o una locacion de veitura. Sonque çò que cal per crompar un bilhet de tren. Ponch.

Que siatz sus l’ordenador o lo mobile, lo site vos aficharà pas cap de distraccion e vos permetrà d’obténer vòstres bilhets rapidament.

D’unas chifras:

sabiatz qu’entre 2019 e 2024 la frequentacion dels trens de la region administrativa Occitanie Pyrénées Méditerranée aviá aumentat de 57%?

Bon viatge en tren per Occitània tota!