La situacion als Estats-Units es un malastre bèl per un cronicaire setmanièr que çò qu’escrives pòt lèu-fait aver perdut de pertinéncia vist qu’una autra decision estrambordanta serà advenguda entre temps!

Tot sembla talament destimborlat que d’unis fan referéncia al libre d’Orwell 1984 per designar la politica (???!!!) menada pel president Trompeta. Pensi que mancan de discernament, per çò que ne sèm puslèu a… 1985!

• Espectacle: Mai fòrt que la remesa dels Cesars o dels Oscars, l’anóncia pel president Trompeta dels tausses de dreits de dogana amb son grand tablèu de chifras multiplas e divèrsas. Ramentava plan que pendent d’ans foguèt animator d’emissions de television… Un costat retrò de distribucion de bons punts pels bons escolans e de punicions (pas de linhas, mas una chifra bèla) pels marrits e missants…

• Pingoins: Dins la tièra dels païses penalizats per las taxas, se trapan las illas australianas d’Heard e MacDonald qu’an dreit a un modèste 10% mas que sos sols estatjants son de pingoins!

• Decolonizator: Lo president Trompeta balha taus diferents que França a Martinica, Guadalopa, Sant-Martin e Guiana que son doncas per el territòris autonòmes. Sant-Pèire e Miquelon fa mòstra de tota sa (relativa) riquesa que se vei autrejar unes 50% de dreits de dogana de pagar (pas luènh del podium e dels 64% de China), fins a çò qu’arribe lo cambiament de taus. E parlem pas tornarmai del Groenland que vòlon tirar de las urpas dels missants colonizaires daneses per los far dintrar dins l’Eden de la dominacion americana.

• ONG: Va èsser complicat per una ONG de contunhar de reçaupre finançaments americans dins la mesura ont lor i cal respondre positivament a un questionari de 36 questions que li demandan causas plan evidentas per lor ròtle dins la societat e de per lo monde: pas aver de projècte sus l’equitat e la diversitat; pas de projècte sul climat o la justicia environamentala; apòrt menat al budgècte e a l’influéncia dels USA; pas question d’egalitat de genre, d’egalitat, d’inclusion; respècte o pas del dreit internacional e de lors institucions; afirmacion que lo projècte menat es dirigit contra China; luta contra l’immigracion illegala cap als USA; suenhs aportats a omosexuals; pas seguirl as nefastas organizacions internacionalas coma ONU e OMS; … Per faire bona mesura, i a tanben una question suls minerals rares…

• Debacte: Una emission de França-Inter, rapòrt a Trump e unes de sos acolites caps d’Estat tan democratics coma el, pausava la question: «Fòls o faguent mina d’èsser fòls?»

• Segregacion: França parla de longa dels productors de Conhac que son pertocats per las mesuras financièras de China e d’America e quasi-jamai un mot sus Armanhac!

• Economia basica: La tòca trompiana es d’ajudar lo poder de crompa dels americans. La mesura es evidenta: americanas e americans auràn de pagar mai car totes los productes qu’arriban d’endacòm mai. D’un autre costat, païses se viraràn cap a d’autras fonts de fornuduras e lo monde esvitarà de crompar productes americans mai cars en rason de las taxas fixadas aprèp las matematicas de Oachington. Pas besonh d’aver fait HEC per comprene l’androna. Aquò vos l’explicariá plan melhor que ieu lo Cristian Almerge qu’en mai d’èsser cantaire occitan foguèt professor d’economia al licèu de Carcassona.

• Chifras: Aumentacion bèla del deficit comercial american en debuta d’an que se faguèron importacions importantas abans las presas de mesuras doganièras. Ara, afòlament de las Borsas e dels retirats americans que veson lor pòrtafuèlha d’accions se demesir. Comença plan… Las protèstas començan d’aparèisser! Per esclarir la situacion, l’òme del Muscadet presica per la liura circulacion de las mercandisas sens cap de taussa doganièra. Dempuèi dos sègles, anarquistas, socialistas e comunistas lutan per faire cabussar lo capitalisme. Fin finala, lo còp fatal pòt venir non pas del defòra mas del dedins del sitèma! Bon, poiriam avançar l’ipotèsi que lo president Trompeta es un anarcò-sendicalista clandestin, mas i cresèm pas tròp…

Martin, Marina e Loïsa

Aquí quicòm de novèl. L’esperit del Martin Luther King trapariá que quicòm vira pas redond als Estats-Units e que s’es batut per res. Auriá decidit de mudar en França (tèrra de libertat?) e se seriá reincarnat dins l’esperit de la Marina! Alara, nosaus cridam a l’engana de primièra! Vist qu’al punt ont ne son las causas, seriá mai logic que la Marina siá una reincarnacion de la Loïsa Miquèl, non?

Aur-Bon Roch